Jowai, Jymmang 25: Mynta ka sngi la shikhi da ki phew ngut ki nongshong shnong kiba ka wan pynïasoh ïalade bad ka Party Congress kiba kymthup lang ïa u ma Emlang Laloo uban ïakhun ïaka Election MLA 2023 na ka 1-Nartiang Consti tuency ha ka jingïalang kaba la long mynta ka sngi ha shnong Namdong West Jaiñtia Hills District.
Ïa kane ka prokram la pynkhreh ha ryngkat ka jingïatreilang ka District Congress Committee (DCC) bad ka Nartiang Block Congress Committee (BCC), ïa ka jingïalang ba la pynïaid da u ma Elias Susngi u President jong ka 1-Nartiang BCC.
Ha kane ka sngi na ka liang ka Party Congress kala ïoh lad ban pynrung dkhot ïa kiba bun ngut naduh ki riew rangbah, ki longkmie bad ki samla na ki shong bapher bapher kiba hap hapoh ka 1-Nartiang Constituency.
La wan ban sakhi lang bad ai mynsiem da u MP ka Lok Sabha u ma Vincent H Pala uba long ruh u President ka Meghalaya Pradesh Congress Committee (MPCC), u District President ma Nehimaya Tyngkan uba long ruh u Vice President ka MPCC ba dei peit ïa ka West Jaiñtia Hills, ma H. Suting District President, ma Rikut Parien General Secretary District, u bah Charles Marngar MDC Mawhati, ki Rangbah Shnong lem bad palat hajar ngut ki riew paidbah jong ka thaiñ.
Baror kitei ki riew rangbah kiba la ai jingkren kila pashet jingmut halor kumno ban pynbha pynmiat ïa ka rukom treikam jong ka Party bad ban trei shitom katba lah ban pynjop don burom ïa ka party ha kane ka samoi Election jong ka snem 2023, ha kane ka sngi la don ruh ki katto katne ki riew rangbah kiba la mih noh na kiwei pat ki party kum na NPP, UDP bad BJP bad wan ïasoh bad ka Party Congress.
U ma Emlang Laloo haba ai jingkren ula pynsngew kum u briew uba ju ai ka jingshakri haka kam sorkar ula shim u ïa kane ka rai ban kit ïa kane ka lyngkor ba khia kaba ula angnud naduh mynsiem kata ban ai ka jingshakria kaba bha tam ïa ki paidbah ka thaiñ khamtam ïa ki nongrep bad kiba duna ka jingïoh jingkot.
Katba na ka liang u President ka (MPCC) ma Vincent H Pala ula ai ka jingkyrkhu kyrdoh ïa kitei ki dkhot thymmai jong ka Party ba kin trei shitom ban kynrong ïa ka eh ka shon bad ban pynkiew ïa ka Party ha baroh ki liang, ha ka juh ka por u pan ruh ka jingkyrshan ba pura na ki paidbah ba ka seng Congress sa shisien ba kan wan biang ha ka bor ban ai ka jingshakri kaba bha tam ïa ka ri hi baroh kawei.
Shuh shuh ula ban jur kum ki nongthep vote kim dei ban ngop ha ka pisa ha ki por Election namar ka pisa ka lah ban wanrah ka jingbabe hadien habud, ha kane ka sngi u ma Pala ula pyntikna ba u ma Emlang Laloo un sa ïoh ban ïakhun kum u kyrtong MLA na ka party Congress na katei ka Constituency. Ula kyntu ïa ki nongshong shnong da kaba ong ba ka party Congress ka don ka nongrim ba skhem bad kaba khuid ba shiba bad ka dei ruh ka party kaba don ïa ka polisi treikam kaba biang bad kaba don ka mon laitluid jong baroh lang.
