Shillong, Jylliew 25: Ka Seng VPP kaba don tang uwei u MP ha Lok Sabha, ka la rai ban nym ïashim bynta ha ka elekshon Speaker jong ka Dorbar Lok Sabha kaban long ha ka Sngi Balang.
Haba ïakren bad u Bah Ardent Miller Basaïawmoit, President ka Party uba don mynta ha Delhi ban synran ïa u Dr. Ricky Syngkon ha ka por ba u leit bam smai, u la ong ba namar ba ka Liang Synshar NDA bad ka Liang Pyrshah INDIA Bloc kim shym la poi sha ka jingïasngew thuh jingmut ban sei da u kyrtong ïamon lang, ka VPP kan nym ïashim bynta ha ka jingjied Speaker.
“Ha ka jingshisha ngi kwah bad kine ki ar kynhun kiba heh ba kin sei tang uwei u kyrtong ban ïamon lang na ka bynta ka shuki Speaker, hynrei haba kim lah kumta ngi la rai ban nym ïashim bynta”, ula ong.
Lah ban kdew hangne ba ka NDA ka la pynïeng ïa u Om Birla kum u kyrtong, uba la long ruh u Speaker jong ka Lok Sabha baladep. Katba ka INDIA Bloc ka la rai ban pynïeng ïa u Kodikunnil Suresh, u MP ba la rim tam jong ka Lok Sabha.
U Bah Ardent u la ong ruh ba wat na liang ka Liang Pyrshah INDIA Bloc ruh ka paw ba kim don ka jingïasngewthuh jingmut para ma ki, namar kawei na ki kynhun ka la pynpaw ba ka Congress kam shym la ïasyllok shuwa ban sei kyrtong.
Ka TMC lyngba u Abhishek Banerjee, ka la pynpaw na ka Congress kam shym la kynjoh ktien ïa ka TMC shuwa ban pynbna ïa u Suresh kum u kyrtong Speaker.
Lah ruh ban kdew hangne ba ka VPP ka la rai ba wat lada ka shong makna ha ka Liang Pyrshah ruh kam nym ïasnoh lang bad ka INDIA Bloc ba ïalam da ka Congress.
