Leh burom ka SURE ïa ki 13 ngut kiba duna ka bor ïohi hadien ba la pyndep ïa ka jingshah hikai

Jowai, Jylliew, 25: Ka kong D.V Lyngdoh, Additional Deputy Commissioner ka West Jaiñtia Hills, kala pynpaw ka jingai khublei ba kyrpang eh ïaki nongshah hikai kiba dei ruh ki briew ba duna haka bor ïohi halor ka jingpyndep jong ki ïaka rukom shna synsar, haka jingïalang bala pynlong mynta ka sngi ha New Hill, Jowai.
Ka la pyntip ba ka West Jaiñtia Hills ka dei ka District ba nyngkong eh ba pynlong kum kine ki rukom ai jinghikai ïa kiba duna haka bor ïohi, khnang ba kin lah ban ïeng hala ki jong ki kjat. Ha ka juh ka por ka ai khublei ïa ka ophis District Skill Development Officer, bala lam khmat da u ma Lambormi Suchen, ha ryngkat ka jingïatreilang ka Society for Urban and Rural Empowerment (SURE) ban pynïaid shakhmat ïa ki kam babha.
Hapoh kine ki hynriew bnai jong ka prokram ai jinghikai, ka kynhun jong ka SURE kala pynlong haki ar tylli ki bynta hapoh West Jaiñtia Hills District kata lyngba ka Meghalaya State Skill Development Society (MSSDS) bad kawei naka ophis jong ka District Social Welfare Department, Jowai.
Ïa kane ka jingai jinghikai lyngba ka MSSDS la pynlong haka shnong Moosakhia kaba hap hapoh ka Amlarem Block bad haka jingaihikai ba kyrshan daka DSWO la pynlong ha Lumbhah Dakha Wahiajer, hapoh ka Thadlaskeiñ Block baroh kitei ki 13 ngut kila ïoh jingmyntoi ha baroh ar bynta.
Ka kong R. Passah, District Social Welfare Officer of West Jaiñtia Hills, haka jingkren kala ïaroh ïa kitei ki nongshah hikai kiba la pyndep ïa kane ka bynta, wat hapdeng ka jingduna ka bor ïohi, ïa kane ka la sakhi dala ki jong ki khmat haka por ba leit jurip ïaki ha ka jaka shah hikai, kumjuh ruh kala ai khublei ïa u nonghikai ma Kelvin Suting uba long ruh kum ma ki hi haka jingduna ka bor ïohi.
U ma Lambor Suchen, District Skill Development Officer, ula pynsngew kmen halor ka jingjop jong kane ka prokram ai jinghikai, u S. Pale, IPO na ka ophis District Commerce and Industries Centre, West Jaiñtia Hills ula batai shaphang ka skim ba dang shu dep plie ka Prime Minister Vishwakarma Scheme da kaba kyntu ba shim ïa katei ka kabu na ka bynta ki jingmyntoi.
Ka Durka Sari, kawei na ki nongshah hikai kila pynsngew shaphang ki jingïakynduh haka jingim bad ki jingeh ba buh haka por ba shah hikai, hynrei ynda la lah ban pyndep ïa ka jingshah hikai kala long pat ka jingmyntoi kaba khraw eh ban pyndap ïa ki jingdonkam da kaba leit die ïa u synsar bala dep shna.
Ïa kitei ki 13 ngut baroh kiba la pyndep ïaka jingshah hikai la leh burom mynta ka sngi 25 tarik u Jylliew ha Newhill Jowai da kaba sam ruh da ki syrnod (Certificates) bad ki tiar ban pyndonkam (startup kits) bala ïarap da ka DSWO.
Na la liang ka SURE kala pyntip ba kin dang ïaibteng ban ai jinghikai ha kine ki sngi ban wan bad na ka liang ka kong D.V. Lyngdoh kala plie kumjuh ïa ka jaka ai jinghikai jong ka SURE kaba don ha New Hill Jowai.
Ïa ka jingïalang hakane ka sngi la pynïaid da ka Aitilut Kyndait, ki nongtrei ka SURE kiba ïadonlang ki kynthup ïa ka Ilasiewdor Gashna, Project Director of SURE, ka Pasqualina Lamare nalor kiwei de.