Shillong, Jylliew 24 : U MLA ka Mawhati constituency, Bah Charles Marngar ha ka sngi Nyngkong u la leit ban kynduh ïa u Myntri ka tnad Bording, AT Mondal ban kyrpad ïa ka jingtuklar lem jong u halor ka jingthut palat ka bording bad ruh ban pynpoi bording noh sha ki 7 tylli ki shnong ha katei ka thaiñ.
Katkum ka dorkhas ba u MLA u phah sha u Myntri, kitei ki 7 tylli ki shnong ki bym pat ïoh bording ki kynthup ïa ka Makdoh, Muska, Amjong, Markhangduba, Amdubighat, Amphreng bad Nongthymmai Makdoh.
Haba kren bad ki lad pathai khubor hadien ka jingkynduh ïa u Myntri, na ka liang u MLA u la ïathuh ba u Myntri u la kular ba mardor un tuklar halor katei ka phang bad la kumno kumno kin ïoh bording noh hapoh u snem 2028 .
“Ngi don mynta ha ka kam bad ngin pyrshang ba kitei ki shnong bym pat ïoh bording kin sa ïoh bording noh shen,” u la bynrap biang.
Haba kren halor ki shnong bym pat ïoh bording, u Myntri u la ong ruh ba ka tnad ka la dep ban sorbe ha baroh kawei ka jylla bad lap ba ki don sa khyndiat eh ki shnong ki bym pat ïoh bording.
“Kane baroh kadei namar ki don ki shnong kiba dang shu mih thymmai shen bad don pat kiba dang shu pynïar pud. Kane kam dei satia kaba la sahteng slem namar ki shnong kiba la ïoh bording ha kito ki por hynrei na ka daw ba pynïar ïa u pud u sam jong ka shnong kumta la donkam ban pynpoi bording biang na bynta ki longïing kiba dang pynkha thymmai,” u la bynrap shuh shuh.
Shwa kane, u MLA u la pyntip ha u Myntri ïa ki jingeh ba ki shnong kiba hap ha ka thaiñ Mawhati, Sonidan, Umtrai bad ki bynta jong ka Umsiang kiba ym ju ïoh tikna ïa ka bording.
