Mawkyrwat, Jylliew 24: U MLA&MDC jong ka Ranikor Constituency, u bah Pius Marweiñ ha ka 22 tarik u Jylliew, 2024 u la plie ïa ka jaka ai jinghikai ei ne ka Free Skills Trainning Centre ha Ranikor, South West Khasi Hills District ïa kaba la pynïaid da ka GCIIT Society bad bei pisa da Meghalaya State Skill Development Society lyngba ka Skills Meghalaya.
Ha kane ka sngi plie ïa ka Free Skills Training la ïadonlang u bah V.W. Nongsiej, u nongseng jong ka GCIIT Society bad uba dei ruh u Executive Director, u Myntri Shnong Ranikor, ki nonghikai bad ki samla pule ki ban sa shah pyntbit ha katei ka shlem ai jinghikai.
Ki jait jinghikai kiba la ïoh ban plie ha katei ka sngi ne ki long ka Domestic Data Entry Operator bad ka Self Employed Tailor kiba ym donkam jingsiew nalor kata ka sorkar kan pynbiang ruh ïa ki jaka sah bad ka bam.
Ha ka jingïalang, u bah Pius Marweiñ ha ka jingkren jong u, u la ia khublei nyngkong eh ïa ka GCIIT Society kaba la wan ban plie ïa ka jaka ai jinghikai ne ka Trainning Centre ha ka thaiñ Ranikor. U la pynpaw ruh ba ka jingdonlang ryngkat jong u ha katei ka sngi plie ka long kum shibynta ban ai mynsiem ïa ki khun samla ba kin wan sha khmat ban shah pyntbit ïa lade ha ki bynta bapher bapher.
Shuh shuh u bah Pius Marweiñ u buh ruh ka jingkyrpad ïa ki khun samla ba ki dei ban trei shitom bad minot khnang ba ynda ki la dep ïa ki jingpule ne jingshah hikai ki lah ban ïoh-kam ïoh-jam bad u la buh ruh ka jingkular ïa ki samla khamtam kito kiba kwah ban sengkam lajong ba lada ki don kano kano ka jingeh u long uba la kloi ban ïarap.
