Shillong, Jylliew, 22: Tang hapoh mynta u snem ka jylla ka la sakhi khah khah ïa ka jingpakhang surok ha kylleng ka rilum Khasi bad Jaiñtia jong ka Jylla.
Mynta ka kynti sa ka Hynñiewtrep National Youth Front (HNYF) South Border Area ha ka sngi Saitjaiñ ka la pynbna ïa ka jingpakhang surok kaba 24 kynta ha surok Mawphlang-Balat ka ban sdang naduh ka por 8:00 baje mynmiet jong ka 24 tarik, Jylliew bad ka ban kut haduh ka 8:00 baje mynmiet jong ka 25 tarik, Jylliew.
“Ka jingpakhang surok kan treikam naduh ka thaiñ Weiloi sharum ter ter ka ban ktah ïa ka thaiñ Lawbah, Mawsynram, Balat haduh Umpung,” la pyntip u General Secretary ka seng Bah Drimshon Mawleiñ ha ka jingïakren bad ki lad pathai khubor.
Une u nongïalam ka seng u la ïathuh ba ka surok ka kham jot bha naduh Weiloi ter ter shaduh ka shnong Umpung.
“Kum ki nongïalam jong ki sengbhalang ngim banse ban mih shakhmat khnang ba ka Sorkar kan sngewthuh ba ym dei tang shi jaka ba ka don ka jingsniew surok hynrei jan baroh kawei ka jylla khamtam ha ka thaiñ Mawsynram bad Ranikor,” u la ong.
“Ngi pan ka jingïatreilang jong ki paidbah nongshong shnong naduh ki nongïalam shnong, ki para sengbhalang bapher bapher, ki nongkamai kali, ki nongbylla sngi ba kin ïatreilang khnang ban pynpei skhor ïa ka Sorkar namar ka jingieh shrah ïa ka surok da ki phew snem,” la kyrpad une u nongïalam ka HNYF.
Haba bynrap halor kane, u President ka seng Bah Kyllang S. Thongni u la ïathuh ba ka jingshim rai ban pynlong da ka jingïakhih pyrshah ïa ka Sorkar ka long namarba ka jingsniew jong ka surok Mawphlang-Balat mynta la 35-40 snem ka la nang kham sniew shuh shuh kat haduh ba ka la pynsyrtok ïa ki paidbah ha ka leit ka wan bad ka rah ka rong.
“Da ki phew tylli ki mynsiem briew ki la duhei namar ka jingjot shaba palat ka surok. Haba ki paidbah ki pang ki shitom ki ladei ban poi sha ki jaka surok ha ka por kaba biang hynrei namar ka jingjot shaba palat ka surok tang ha shiteng lynti ki la khladnoh,” u la ong.
U la ong ba ka jingsniew shaba palat jong ka surok ka la pynkiar ïa ki nongjngohkai pyrthei ban hiar sha ki jaka jngohkai pyrthei ha wah Umngi, sha Mawsynram ka shnong kaba jur slap tam ha ka pyrthei bad kane ka surok ka pynïasoh ruh wat ïa ka Border Haat ba don ha Nolikata Ranikor, Lalpani Dangar bad ha Ryngku kiba don ha khappud jong ka India bad Bangladesh.
Ka jingïakhih mynta u snem 2024 ban pyrshah ïa ka jingieh beiñ jong ka Sorkar halor ka jingjot rathai jong ki surok ka la sdang nyngkong eh ha u bnai Lber da ka Joint Action Committee (JAC) ki khatwei tylli ki shnong na Elaka Narpuh, East Jaiñtia Hills District ban pyrshah ïa ka Sorkar halor ka jingjot shaba palat jong ka surokbah NH-6 ha Narpuh.
Hadien kane, la mih sa ka longkmie na them Ribhoi ka Kong Bindas Syiem. Ka Sorkar ka la pyndem ha ka jingdawa jong ka Kong Bindas Syiem hadien ba ka la pynlong da ka jingshah thngan kaba khlem pud sngi ha nongbah Shillong ban dawa ïa ka Sorkar Jylla ba kan shna noh mardor ïa ka surok Nongpoh-Umden-Sonapur.
Tang hadien shisngi, kum ka jingkyrshan ïa ka jingdawa jong ka Kong Bindas Syiem, ka Hynñiewtrep Integrated Territorial Organisation (HITO) Umden Circle ka la pynlong ïa ka jingïakhih da kaba pakhang ïa ka surok Umden bad thang ruh ïa ki tyngshop jong u Myntri Rangbah Conrad K. Sangma, Symbud Myntri Rangbah Bah Prestone Tynsong bad MLA ka Nongpoh Bah Mayral Born Syiem.
Nangne ka jingïakhih ka la pur biang sa sha rilum Jaiñtia ha kaba ka Joint Action Committee (JAC) Dong Namchiang ka la pakhang khlem pud sngi ïa ka surok National Highway-6 kaba la ïaid mynta sha ka sngi kaba saw.
