Khliehriat, Jylliew, 20: Halor ka jingjia shah thombor kaba la jia ha shnong Kuliang East Jaiñtia Hills District, ha kaba ki shipai BSF ki la leit thombor ïa ïing ka sem jong ka kong Martina Pohshna bad pynmynsaw ïa u kurim jong ka bad jrong kti ruh ïa ka khun kaba dang 15 snem kyrta, na ka liang ka Jaiñtia National Council JNC ka pynrem jur ïa kane ka jingleh riewkhlaw ki shipai BSF .
“Haba ka seng ka iohi ïa ka video kaba la saphriang stet kaba pyni ba ki shipai BSF ki la rung jubor ha ka ïing sah jong ka kong Martina Pohshna, ki la leh ba heh bad ka tim sih tim sang ki la rah lem bad ki tiar pynmynsaw ha kti, kane ka jingleh ki BSF ka la pynkyndit bad pynher syrngiew ïa ki nong shong shnong haduh katta katta namar ka jingjia ruh ka jia haka por miet por synnia bad ym lah ruh ban tip kaei ka jingmut jong ki sha lyndet” ong u kyrwoh
“Katkum ka video ba lah paw ha ki social media ngi iohi ba katno tam ka jingleh donbor bad ka jingleh khlemakor ki BSF ryngkat ka tim sih, kata ruh iaki ba pli ki longkmie bad kane ka jingleh jong ki BSF ka pyni shai ba kim burom shuh iaki nongshong shnong bad ïa ki Waheh Shnong, ka seng ka sngewphylla ba lada don kaei re kaei ka kam ki la dei ban pyntip shwa sha ki Waheh Shnong shwa ba kin rung shapoh ka shnong, hynrei kim shym la leh satia kumta, sa kawei ruh ki rung ha ka por miet kaba dei ka por thiah,por dem ki briew bad ïa kane hi ngin nym lah da lei lei ruh ban pdiang”.
“Ka seng ka buh ruh ka jingkylli ba balei ki shipai BSF kim shym ïa lam lang ïa ki pulit namar katkum ka aiñ, ki BSF da lei lei ruh kim lah ban trei shabar jong u pud bad ïa kane hi ki dei ban pan jingiarap na ki pulit kiba don hapoh kato ka thaiñ ban ioh leh ïa kaba donkam, hynrei ïa kane ruh kitei ki shipai kim shym la leh bad kane ka pyni shai ba ki shipai BSF kim burom shuh wat ïa ki pulit ka jylla bad lada ka ïai long kumne imat wat ïa ka sorkar ruh kim don jingburom shuh hakhmat kine ki BSF”.
“Ka seng dang ha kine ki bnai ba lah leit bad ka la iakynduh ruh markhmat bad u symbud Myntri rangbah ka jylla, u bah Prestone Tynsong ryngkat bad ka jingthoh ba dei ban weng noh mardor ïa ki ktem jong ki shipai BSF kiba shong ap pahara hapoh ki khap shnong khap thaw namar kine ki jaka ba ki shong pahara kim dei satia ki jaka shong jong ki BSF”
Ka JNC ka dawa jur na ki bor sorkar ba dei ban kem mardor ïa kito ki BSF kiba donkti ban wanrah ïa ka huri hura bad timsih ïa kato ka longïing ha Kuliang, ka seng ka kyntu ba ka aiñ kadei ban long salonsar khlem da ñiew shiliang khmat, watla u dei u shipai BSF ruh bad lada ka sorkar kam lah ban kem ïa ki bad leh katkum ka aiñ, kane kan paw shai ba ka sorkar ka pyndem tdong hakhmat ki shipai BSF.
“Ka seng ka phah ïa u kyrwoh ba shai sha ka sorkar ban leh ia kaba donkam tam ym ban shu peitkai ïa ka eh ka shon jong u paidbah bad lada ka sorkar kam shym lah ban leh eiei bad ka shu sngapjar, na ka liang jong ka seng kan sa phai da kiwei pat ki sienjam bad yn iakhun ruh tyngeh ban pynioh ïa ka jingbishar kaba hok na ka bynta ka bha ka miat hi ha ka imlang ka sahlang.
