Hadien ba ïasiat ïoh kem ki pulit 2 ki snar nongtuh ba dang 18 snem kynthup ka kynthei ha Ranibari

Shillong, Lber, 26: Ki Pulit ka Rani Border Outpost ha ka sngi Baar ha ka por kumba 9:30 mynstep ki la ïoh jingtip ba ki don ki runar kiba kieng atiar hajan ka shnong Ranibari.
Tang shu ïoh jingtip halor kane, u In-Charge jong ka Rani Border Outpost ryngkat ki nongtrei jong u mar mar ki la leit kthong ïa kine ki runar. Tang shu ïohi ïa ki Pulit, ki runar ki la synreit kuli hynrei na ka liang jong ki Pulit kim shym la pynphai kylla namarba ki don ki khynnah bad ki kynthei hajan kane ka khlaw.
Ha ka jingbeh thong, ki Pulit ki la ïohkem ïa ki arngut ki runar kiba la ithuh kyrteng kum u Ajit Rabha uba la 18 snem ka rta bad ka Kavita Rabha kaba la 18 snem ka rta.
Ha ka jingtohkit, kine ki arngut ki la phla ba ki dei kiba ju donkti ha ki kam runar ba la pyntbit bha ïalade ha ka kam tuh kam thiem, kynthup ruh ban ot tuh ïa ki Dieng Sal, ban tuh ïa ki thuk thuk ar shaka bad ban tuh ïa u kwai na ki bri ki bsah. Nalor kata, ki Pulit ki la lap ksai ruh ba u nongïalam jong kane ka kynhun ki runar u dei u Panah jong u Ajit Rabha, ïa uba la tip kyrteng kum u Rudra Rabha.
Ki Pulit ki la ïoh ban kurup ruh ïa kawei ka suloi SBML bad u gunpowder ha ka jingkhynra ïa ka ingsah jong u Ajit Rabha.
Ki Pulit jong ka Ri-Bhoi haduh mynta ki dang pynlong ka jingkhynra ha kane ka khlaw hajan ka shnong Ranibari ban ïohkem ïa ki dkhot jong kane ka kynhun ki mentuh.
Ka khubor ba la ïohlum na ki Pulit la ong ruh ba ha ka jingleit khynra bad buddien ïa kitei ki runar la ioh ruh ban pynpulom ïa ka jaka rieh tngen jong ki bad la ioh ruh ban kurup ïa kawei ka Motor Bike.
Shuh shuh, u Superintendeng of Police ka Ri Bhoi Jagpal Singh Dhanoa u la ïathuh ruh ba ka jingtohkit bad ka jingbuddien halor kane ka kam beaiñ ka dang ïaid shaphrang bad na ka liang ki Pulit ki la dep ruh ban register case ïa kitei ki runar ha Khanapara Police station ban leh katkum ki kyndon jong ka aiñ.