Shillong, Lber, 19: Ka Ingbishar Supreme Court ha ka sngi Baar ka la buh sngi ban shong bishar haduh ka 9 tarik, Ïaïong 2024 ïa ka jingujor jong ka North East Students Organisation (NESO) ban pynsangeh ïa ka Rule jong ka Citizenship (Amendment) Act 2019.
Katkum u kyrwoh ba la phah da ka Khasi Students Union (KSU), ka Ingbishar Supreme Court ka la ïaiban ïa ka rai ba la pynmih dang shen ban shong bishar la ka jong ïa ka jingujor na ka bynta ka jylla Assam, ka Tripura bad ka thaiñ Shatei Lammihngi nalor kiwei pat ki jingujor ba la ïoh pdiang na ki bynta bapher bapher jong ka ri India.
Ka KSU ka la ïathuh ruh ba ka Ingbishar Supreme Court ka la thung ruh ïa u Ankit Yadav, uba dei u muktiar jong ka All Assam Students Union (AASU) bad ka North East Students Organisation (NESO) kum u Nodal Officer na ka bynta ki nongujor. Ka Ingbishar ka la bthah ruh ïa ka Sorkar India ban ai jubab halor kine ki jingujor shwa ka 9 tarik, Ïaiong, 2024.
Kum ban shu pyntip hangne, ki nongïalam jong ka NESO ki la leit sha Delhi ban ujor halor ka jingpyntreikam ïa ka Citizenship (Amendment) Rule, 2024 bad kyrpad ïa ka Ingbishar ba kan pynsangeh noh mardor ïa kane ka Rule ba la pynmih dang shen da ka Sorkar India.
