Sdang thwet Pulit ïa kiba bom shnong ïa ki arngut ki riewsniew ha Mawthlong

Shillong, Lber, 19: Lai ngut ki briew ba kynthup arngut na ka shnong Mynsain bad uwei na ka shnong Nongbsap ki la shah rah tohkit ha ki Pulit ka Sohïong Out Post hadien ba arngut ki riewsniew ki la shah bom shnong ha ki paidbhur ha ka shnong Mawthlong ha ka sngi Saitjaiñ jong ka taiew baladep.
Katkum ka jingpyntip jong u Superintendent of Police ka East Khasi Hills u Rituraj Ravi ki arngut lai ngut kiba la shah kem ha ki Pulit ha ka miet synnia Lah Sngi u Blei ki long u Skerling Pyrtuh, 39 snem na Mawthlong, u Traibor Lyngdoh, 30 snem na Nongbsap bad u Kyntiewnam Pyrtuh, 28 snem na Mawthlong.
U SP u la ithuh ba ia kine ki lai ngut la pyllait noh ha ka por 12 baje mynsngi lyngba ka Bail Bond hadien ba ladep ka jingtohkit.
“Ki Pulit ki la wan thwet hynnin mynmiet bad ki la rah arngut ki briew na ka shnong Mynsaiñ bad uwei na Nongbsap,” ong u Rangbah Shnong ka shnong Mawthlong Mynsaiñ u Bah Starwell Mawlong ha ka jingïakren bad u nonglum khubor hadien ba la wai ka dorbar.
Ka Dorbar Shnong Mawthlong Mynsaiñ ka la lum da ka dorbar paidbah hadien ba ki Pulit ki la rah ïa kine ki lai ngut ki briew na ka bynta ban pynlong ïa ka jingtohkit ha kaba ïadei bad ka jingjia ha ka sngi Saitjaiñ kaba ki Video ki la saphriang ha ka Social Media.
“Ban kynnoh (ïa ki lai ngut) ba ki dei ki nongkynshoit ngim sngew ïahap. Haba don ba hylla, ki paramarjan ki hap ban ai jingïarap hynrei ban kynnoh ba ki nongkynshoit ka long kaba bakla,” la ong u Bah Mawlong haba pynpaw ïa ka jingbym sngew ïahap hadien ba ki lai ngut ki briew ki la shah rah tohkit ha ki Pulit.
Katkum ka jingïathuh jong u Rangbah Shnong, ki don lai ngut kiba donkti ha kane ka jingjia katba arngut kiba synran ki la shah kem ha ki paidbah bad uwei pat uba donkti ban ksih ïa ka riewkynthei u la leit phet. U la ïathuh ruh ba ki paidbah ki la pynjulor ruh ïa ka kali jong kine ki lai ngut.
Haba ïathuh ïa ka jingjia kaba la lam sha ka jingbitar jong ki paidbhur ban bom shnong ïa ki arngut ki rangbah, u Bah Mawlong u la ong, “ngi ïoh jingtip ïa kane ka jingjia ba u don uwei u briew uba rung hapoh kawei ka ing u ksih, u khnoit bad u set na shyntur jong kawei ka riewkynthei kaba don san ngut ki khun bad u kurim ruh u la ieh um shym la sah lang shuh.”
U la ïathuh ba kane ka riewkynthei ka la lait na ki tyrsim jong u runar da kaba dait ïa ka kti jong u bad ïoh ban pyrta jingïarap. “Ki paramarjan tang shu ïohsngew ïa kane ki la pyntip sha nga u Rangbah Shnong. Hynrei ynda la poi hangtei (ha ka jaka ba la jia) kato ka jingkynnoh menshohnoh ngim lah shuh ban bahkhlieh namarba ka jia ha khappud jong ka shnong (Mawthlong Mynsaiñ). Ban ong ba ka jingjia la leh da ki nong Mawtlong ngam lah shuh ban pynshong nongrim namabar la ïakhleh lang ki paidbah kiba najan shnong,” la ïathuh u Bah Mawloong.
“Ngi kum ki nongïalam shnong ngi la pyrshang ban pyllait ïa kito ki briew bad ngi la rah sha ingdorbar ryngkat ka jingdonlang jong u Secretary Shnong, ki Rangbah Dong ban bishar ïa kane ka kam. Hynrei namarba ki paidbah ki la bun da ki hajar ngut ngim lah shuh ban tehlakam namarba ki paidbah kim ailad shuh. Ynda la kham sngi leilei, ki la nang bun shuh shuh ki paidbah bad kum ki nongïalam shnong ngi la poi ha ka kut lad,” la ïathuh shuh shuh u Bah Mawlong.
“Ngi la pyrshang katba lah hynrei dei tad haduh ka por ba la wan poi ki Pulit (la ïoh ban pyllait im ïa ki arngut) namarba ki paidbah ki kwah beit ban tangon ïa ki nongleh kam sniew,” ong u Bah Mawlong
“Ngi ka shnong ngi la leh katba lah ban ïada. Ki paidbah ki la pynpra wat ïa ka Iingdorbar hynrei namar ka jingbun palat ki paidbah ki la ïoh bom bad shoh bad wat haba ki Pulit ki la ïaleh ban pyllait, hynrei ki paidbah ki knieh ban bom beit (ïa ki arngut)” u la ong bad bynrap, “lada ïa ki Pulit ruh ki paidbah kim ailad ma ngi leilei ki nongïalam shnong ha ka bor barit ngin lah leh aiu.”
“Halor kane ka jingjia, ka shnong, ngim pdiang ba ka dei ka jingtharai menshohnoh. Ngim tip la u dei u nongtuh ne u nongbatbor namarba ngim ïoh shuh ban bishar. U la ïathuh ka jingjia ka dei ha ka por kumba 2:30 baje eiei,” u la ong.
“Nga la pyrshang ban tem da ka lynti. Hynrei ngim tip la ka ain kan ailad neem ban thaw ïa ka jingbha,” u la bynrap.
Haba kylli u la ong, “ngim pat shim ïa ka rai hynrei ynda la bishar bniah ngi kum ka shnong ngi la ai jingïarap ban ujor ejahar khnang ba ka lanot riewkynthei kan ïoh ïa ka hok.”