Ka Dr Ampareen kan jop beit na ka Shillong Parliamentary Constituency; kob u Dy. CM
Shillong, Lber 19 : U National General Secretary ka NPP bad Symbud Myntri Rangbah Bah Sniawbhalang Dhar ula pynpaw ïa ka jingsngewthikna ba ka Dr Ampareen Lyngdoh kyrtong ka NPP kan jop beit na kane ka Shillong Parliamentary Constituency ha kane ka elekshon Lok Sabha ka ban long ha ka 19 tarik Iaiong 2024.
“Ngim don jingartatien ba ngin jop ïa ka elekshon” ong u Bah Sniawbha haba ïakren bad ki nongthoh khubor.
Haba pynpaw ba ka jingdon vote jong ka NPP ka la kiew bun bun shah hadien ka jingwan pynïasoh ki 2 ngut ki MLA bad kito ki MLA ba rim ne ki kyrtong jong kiwei ki party ha ka election MLA ba la dep. Ula ïathuh “Ka jingïoh vote jong ka NPP ha ka election MLA ba la dep hangne ha Khasi bad Jaintia Hills ka long 3.17 lak kata ha u 2023. Mynta ka la nang kiew da ka jingwan pynïasoh sa ki arngut ki MLA ka PDF-u bah Banteidor Lyngdoh bad bah Gavin Mylliem, nangta u MLA ba rim ka Mawsynram bah Himalaya M Shangpliang bad ruh ka jingwan ïasoh ki MDC Bah Carnes Sohshang bad Batskhem Ryntathiang”.
Nalor kane u la pyntip ba ka MDC barim ka Nongpoh, Kong Rona Khymdeit ruh kan sa wan pyniasoh sha ka NPP ha ka 22 tarik Lber, u Bah Sniawbha ula ong ba ka jingdon vote jong ka NPP kala nang kiew sa shi lak eiei.
Halor ka jingkynthoh u MP ka Congress na Shillong Bah Vincent H Pala ba ka jingpynïeng ïa arngut ki kyrtong kynthei da ka NPP kam dei satia ka jingpynkupbor ïa ki Kynthei hynrei dei ba kam don lad da kumwei pat, une u Nongïalam ka NPP ula ong ba ka party ka la pynieng ïa ka Myntri Sorkar kum ka kyrtong namar ka lah ban ai ka jingïakhun kaba itynnad pyrshah ïa u bah Pala.
“Phi mut ngi duna ïa ki kyrtong?. Ngi don ïa ki kyrtong kiba biang ba biang ban ïakhun pyrshah ïa u. Na kata ka daw ngi la ïakren bad ngi la shim ïa ka rai kaba dei bad ngi la jied ïa ka Dr Ampareen namar kan sa jop beit ïa ka elekshon” ula ong.
Nalor kane, u Bah Sniawbha ula kren ruh halor ki kam pynroi bapher bapher jong ka Sorkar MDA ha kine ki hynriew snem bala leit noh.
“Ki paidbah ka Meghalaya ki la sakhi ba ym dei tang ka Sorkar MDA-I bad 2 kaba la shimkhia ïa ki ishu kiba mih bad kumjuh ruh kumno ban tei pyndep kloi ïa ka Sor Shillong kaba thymmai ha Mawdiangdiang ban pynkylluid ïa kane kaba mynta. Ngi la khot tender ban tei ïa ki ophis, ïa ki surok, ïa ka jingring umdih. Phi ïohi ïa ki surok, ym duna ïa ka T.10,000 klur la dep shna surok ha kine ki 6 snem. Ha ka por ba ngi shimti ïa ka Sorkar, tang khyndiat tylli eh ki longïing ki don umkor ha ïing hynrei mynta palat 3 lak kila ïoh kor um ïing. Nalor kane, ym duna ïa ka 2000 lane 3000 km ki surok thymmai la dep ban shna. Dang shen, ka Kynhun Myntri kala rai ruh ban pynpoi bording elektrik sha ki shnong bym pat don bording. Ka MDA kala kular ban kyntiew ïa ki kam jngohkai, kala pynshna ïa ki madan artificial turf ha jan man ki district ka Jylla ban kyntiew ïa ki kam ïalehkai sport” ula ong.
Une u Symbud Myntri Rangbah ka Jylla ula ong ba lada ym dei namar ka jingtreikam jong ka Sorkar, ka NPP kan ym ïoh satia haduh 26 seat ha ka elekshon MLA 2023.
“Ha u 2018 ngi jop 19 seat bad ha u 2023 ngi la kiew sha ka 26 seat. Nga sngew ba kane ka dei namar ka jingtreikam bha jong ka Sorkar. Ngi tip ba ngim lah ban pynhun ïa baroh namar kin don hi kiba pyrshah sorkar, kiba pyrshah ha kiba bun ba lang hynrei kum ka Sorkar ngi la trei shitom ban wanrah ïa ki kam pynroi khamtam haba phai sha ki lad jingïarap ïa ki samla” ula ong.