Ïakynduh kyrpang ka Dr. Amapreen ïa ki nongïalam ka NPP ha Patharkhmah
![](https://mawphor.com/wp-content/uploads/2024/03/Kong-Ampareen-ha-Patharkhmah.jpg.jpeg)
Nongpoh, Lber 17: Ka Dr. Ampareen Lyngdoh kaba long ka Myntri jong ka Sorkar Jylla bad ka kyrtong jong ka National Peoples Party (NPP) na Shillong Seat ban aireng ha ka elekshon Lok Sabha ha ka sngi Saitjaiñ ka la ïa kynduh kyrpang ïa ki nongïalam jong ka NPP ha Jirang Constituency kum shi bynta ka jingpynkhreh ïa ka election.
Kum ka Myntri Sorkar ha kane ka sngi ka Dr. Ampareen ka la leit ban jurip ïa ki ar tylli ki jaka ai jingsumar paidbah ba kynthup ïa ka CHC Patharkhmah bad ka Health Sub Centre ha ka shnong Umsong ba la synran lang da u MLA jong ka Jirang Bah Sosthenes Sohtun lem bad kiwei kiwei ki nongïalam ka NPP.
Ha ka jingïakynduh lang bad ki nongïalam ka party ha Dorbar Hall Patharkhmah, ka Dr. Ampareen ka la ai mynsiem ruh ïa ki nongïalam ka party bad ki la shim ruh ïa ka rai ban trei shitom na ka bynta ban pynkhlaiñ ïa ka party ha kane ka election MP kaba long ka thong na ka bynta ka jingjop ka party bad ban pynjop donburom ïa ka Dr. Ampareen Lyngdoh.
Ha ka jingïalang, ki nongïalam bad ki nongkitkam bahakhmat eh jong ka NPP na Ri Bhoi Sepngi ki la wan sha kane ka jingïalang ban sngap ïa ki jingkren jong ki nongïalam naduh ka Dr. Ampareen Lyngdoh, u MLA ka Jirnag Bah Sosthenes Sohtun, u Bah Batskhem Ryntathiang MDC ka Mairang, u Bah Macmillan Byrsat MLA barim ka Nongstoiñ bad kiba la shim rai ruh ban pynkhlain ïa ka party na ka bynta ka jingjop ka party ha kane ka elekshon na Shillong Parliamentary Seat.