Tura, Lber 16 : Lai ngut ki runar kiba shna ïa ka social media page bad kam ba pynkhie im ïa ka GNLA kaba la iap bad khot ïalade kum ka “GNLA-R ( Regroup)”, kila shah kem ha ki Pulit ka Ri-lum Garo ha ka sngi Saitjain.
Kine ki laingut ki dei ki runar kiba ju donkti ha ki kam dawa pisa, lute bad kiwei kiwei, ong ki Heh Pulit.
Kawei ka jingthoh ka la mih ha Facebook myn ha ka 22 tarik Rymphang ba la thoh da uwei u briew uba ai kyrteng ïalade da u Goera Pantora Sangma, uba kam ba u dei u Chairman ba thymmai ka GNLA-R kaba don ïa ka Headquarter ha Tura.
U Superintendent of Police ka West Garo Hills ula pyntip ba ki Pulit haba tohkit ïa kane ka jingkam, kila lap ïa kine ki lai ngut bad ki la kem ïa ki na kylleng ki jaka ka West bad North Garo Hills.
U iathuh ba kine ki runar kila phla ïa ka jingshna ïa ka facebook page u ‘Goera Pantora” bad thep ïa kane ka kyrwoh khubor.
Kine ki laingut ki kyrteng u Sengsrang N Marak, Thosengcheba A Sangma bad u Chijang A Sangma.
Na kine ki briew, ki Pulit kila ïoh kurup ïa ki mobile phone bad Sim card, ka laptop, ki booklet ba don 82 tylli ki pamphlet bad ruh 6 tylli ki pamphlet ha ka kyrteng jong ka All Garo Hills Merchant Association.
U SP ula kyntu ba lada don mano mano ba tip shaphang kiwei pat ki dkhot ka GNLA-R ba kin sngewbha ban ai jingtip sha ki thanad kiba don marjan.
