‘Ka jaitbynriew ka bym don ïa ki khanatang ka long ka jaitbynriew kaba ïap’, Dolloi
>>La pyllait paidbah ïa ka kot “Ki kjat jingshai ka Mynnor” ba thoh u Dr. H.H. Mohrmen >>Plie kot “Ki kjat jingshai ka Mynnor”
Jowai, Jymmang 21: Ïa ka kot “Ki kjat jingshai Mynnor” ba thoh u Dr. H.H. Mohrmen la pyllait paidbah mynta ka sngi ha ka jingïalang ba la pynlong ha H.K Singh Memorial Secondary School, Jowai da u kongsan uba dei ruh u Dolloi ka Elaka Jowai u ma Puramon Kynjing.
Hashwa kane ka la don ka jingïalang ba la pynïaid da u ma M.M Thaiang uba long ruh u nongthoh kot bad u Editor jong ka kot khubor ‘YUTIP’ bad la ïoh ruh ki jingkren shaphang kane ka kot bad ki jingmut jong ka da u ma Wansalan. E. Dhar bad ka kong R.M Khonglah nonghikai Khasi Department ka Thomas Jones Synod College Jowai.
U Dr. H.H. Mohrmen haba kren ha kane ka sngi ula ong ka jingpynmih ïa kane ka kot, shibynta na ki na ki jingthoh kiba ula ju leit ban ïashim bynta ha ka All India Radio, Shillong ha ka prokarm ‘Tip phi ïa tip mo’, bad ïa kane ka kot la ïarap pisa ha kaba shon ïa ka da ka tnad Art & Culture jong ka sorkar jylla.
Ha kane ka kot ki don ki jingïathuh khana shaphang jong ki pateng ki longshwa manshwa, ula pyntip ruh ha u bnai August ne September yn sa lah ban pynmith ïa ka kot jong u ha ka ktein phareng ka ‘Cultural History of Jaiñtia Hills and Tradition’.
u Dolloi ka Elaka Jowai u ma Puramon Kynjing kum u kongsan haba ai jingkren ula ai ka jingïaroh ïa u Dr. H.H Mohrmen uba la lah ban pynmih ïa kane ka kot bad u kitbok kitrwiang ïa u ba un dang lah ban pynmih khang bun ki kot ha kine ki sngi ban wan.
‘Ka jaitbynriew ka bym don ïa ki khanatang ka long ka jaitbynriew kaba ïap’, hynrei lada phai sha kane ka jaitbynriew jong ngi ka don ïa ki khanatang pateng la pateng, la ong u Dolloi, ha ka juh ka por uba ban jur ba ka jingthoh kot kan ïarap shuh shuh ban pynproh ïa ka jabieng bad kum ki briew ki dei ban ai jingbam ïa ka jabieng lyngba ka jingpule ïa ki kot.
U Dr. H.H. Mohrmen ula dep thoh ruh ïa ki kot kiba kynthup ïa “Ka jingiaid lynti sha ka ri ki Riewkhraw, 2004, ka jingngeit ka Balang Unitarian ha ki jingkylli bad jubab, 2010, ka Kotkti 2015 bad ka jingtip kyllum shaphang ki ñiam.
La pynkut ïa ka jingïalang da ki kyntien ai khublei ïa baroh da ka khun u Dr. Mohrnem ka samla Mattimi Passah.