Shim kabu ki nongdie kot ha ïew Nongpoh, die tam ïa ka dor bala buh, sha u DC ujor ka KSU
![](https://mawphor.com/wp-content/uploads/2024/02/KSU.jpeg)
Nongpoh, Rymphang 26: Kiba bun naki nongdie kot ha ïew Nongpoh, kila shim kabu shaba palat ha kum kane ka por sdang skul ban die tam naka dor bala buh kaba la buh jingeh ïa kiba bun ki longiing ba duk ba rangli.
Halor katei ka jingshim kabu ki nongdie kot ha ïew Nongpoh naka liang ka seng Khasi Student Union, Nongpoh Circle haka sngi Saitjaiñ kaba dei ruh ka sngi ïew Nongpoh kila leit ban jurip hi ïaki dukan kot ban lap ïaka jingshisha hadien bun ki jingujor naki paidbah bad ki kmie ki kpa bad kum ka seng kala lap ba ki nongdie kot ki shim tam naka dor bala buh haduh 10 bad 20 tyngka na kawei ka kot da kaba aidaw ba ki lut bun ka bai rong bai rah ïaki kot.
Shuh shuh naka liang ka seng mynta ka sngi hapoh ka jingïalam jong u Samla Baiashanlang Kharshanlor Secretary ka Nongpoh Circle, Samla Saiñkupar Syngkli Education Secretary, Samla Iabhalang Nongrum President ka Nongpoh Town Unit ryngkat ki dkhot kila leit ban ujor syndon sha u Deputy Commissioner ka Ri Bhoi District u Arpit Upadhyaya ba un shimkhia ïa katei ka jingshim kabu ki nongdie kot khamtam ka jingeh jong ki longiing ba duk ba rangli.
Haba kren sha ki lad pathai khubor naka liang u Samla Baiashanlang Kharshanlor u la ong ba kum ka seng ka dap da ka jingsngewkhi kaba jur halor ka jingshim kabu palat ki nongdie kot nalor ba ki kren heh ïaki nongleit thied nalor ka jingdie haka dor kaba rem, bad dei halor katei ka nongrim ba kum ka seng hadien bun ki jingujor kala leit ban jurip hi ïaki dukan die kot ha ïew Nongpoh ha kaba la lap shisha ba ki shim kabu ban die tam shibun shah naka dor bala buh.
U la ong ruh hadien ka jingïakynduh bad u DC ka Ri-Bhoi naka liang jong u u la kular ban shimkhia ban pynlong ka jingtohkit ïa katei ka kam khnang ba ki dukan kim dei ban shim kabu palat hynrei ban die katkum ka dor bala buh ban lait shah ktah ki kmie ki kpa bad ki khynnah skul.