Shillong, Rymphang 25 : U MDC ka BJP na Tura, u Bernard N Marak u la kyntu ïa u Myntri ka tnad PHE u Marcuise N Marak ban peit halor ka jingpyntreikam ïa ka Jal Jeevan Mission ha rilum Garo kynthup ïa ki shnong kiba hap ha ka constituency jong u Myntri.
Ha ka shithi sha u Myntri, u Bernard u la ong ba ki shnong ha rilum Garo ki la mad bun ki jingeh ban ïoh ïa ka umbam umdih kaba biang kaba long ka jingdonkam kaba kongsan tam na bynta ki paidbah.
U ong ruh ba ka JJM kadei ban pynbiang ïa ka umbam umdih kaba biang sha baroh ki longïing hynrei u la kynnoh pat ba bun na ki kam jong ka JJM la ieh shiteng ha kiba bun ki shnong namar ka kam ba trei da ki kontraktor kam long satia nalor ba don ïa ki top bad ki pipe ki bym treikam.
“Kane ka long kum ka jyrsieh kaba da ki klur tyngka ba la mang da ka sorkar pdeng kum ka skim da ka thong ban pynpoi umbam umdih kaba biang sha baroh ki longïing,” u la kynnoh.
U MDC u la ong ruh ba la dep ai da ka RTI sha baroh ki distrik lyngba ki Deputy Commissioner da kaba kyntu ïa u Myntri ba un bthah ïa ka tnad PHE ba kan ai ki jingtip kiba bniah khnang ba kan don ka jingtreikam kaba khuid bad kaba shai ka bym don ka jingleh thok.
U ong ruh ba ki shnong kin sa phah ïa ki jingujor sha ki SDO/Executive Engineer kaba ïadei bad kane nalor ba kin sa phah ruh sha u kum u Myntri ban tuklar lang.
La kynnoh ruh ba ha kiba bun ki shnong la shu pynbor ban soi kyrteng ba la dep ïa ka kam ha kaba ym baroh ki longïing ki la ïoh ïa ka um.
“Ki longïing ki khlem ïoh ïa ka um kaba kylla long pynban ka jyrsieh ha jaka ka skim. Kumta, lah ban pynkut ba ka don ka jingpyrshang ban pynduh noh ïa ka thong kaba u Myntri Rangbahduh ka Ri u Narendra Modi u thrang ban pynpoi umbam umdih sha baroh ki longïing,” ong u MDC.
