ïamir ka NEIGRIHMS ban pynshlur ïa ki paidbah ban synniang ïa ki dkhot met ynda la iap
Shillong, Rymphang 25 : Ka NEIGRIHMS ryngkat bad ka Zublee Foundation, & North Eastern Development Finance Corporation (NEDFi) ha ka sngi Saitjaiñ, ki la pynhap pyrda noh ïa ka Workshop halor ka phang ‘Deceased Organ Donation’ ne ka jingnoh synñiang ïa ki dkhot met ynda iap.
Ha katei ka Workshop kaba ar sngi la wan ban ïashim bynta da palat 200 ngut ki nongïashim bynta kiba kynthup ïa ki bor pynïaid hospital, ki doctor, ki Nurse bad ki nongtrei jong ka NEIGRIHMS ban pynsngewthuh bad ban ai jingtip ïa ki shaphang jong ka jingsynñiang ïa ki dkhot met ynda la iap (Deceased Organ Donation) bad ka jingpyn bujli dkhot met (Transplantation).
Ka jingseisoh jong kane ka prokram ka dei lyngba ka jingïatreilang jong u Prof. Ranendra Hajong, Department of General Surgery, NEIGRIHMS bad u Nodal Officer, SOTTO Meghalaya bad ka Priyanka Borah, CEO jongka Zublee Foundation bad ka kynhun ka jong ki.
U Prof. (Dr) C. Daniala, Medical Superintendent, NEIGRIHMS, ula ong, “Ka NEIGRIHMS ka ïeng skhem ban pynurlong shisha ïa ka jingnoh synñiang ïa ki dkhot jong ka met na ka bynta kito kiba donkam bha. Ngi ngeit ba kane ka sienjam ka don ïa ka lad ban ïada ïa ka jingim jong kiwei pat ha ki snem ban wan”.
Katba u Prof. Nalin Mehta, Director ka NEIGRIHMS, ula ong, “Kane ka workshop ka la long ka rynsan kaba biang bha ïa kiba don bynta ha ka ban ai jingsumar, ki samla pule bad ïa ki nongtrei ban ïoh ïa ki jingtip kiba bniah bad ban shim khia ïa kino kino ki bynta kiba ïadei bad ka jingnoh synñiang ïa ki dkhot met ki jong ki”.
“Nga ngeit ba kane ka sienjam kan ïarap shibun ha ka ban pynsngewthuh bad ban pynshlur ban don ïa ka jingïakren ban noh synñiang ïa ki dkhot met hapoh ka imlang sahlang jong ngi. Khamtam eh ha Meghalaya, ha kaba ka jingpynsgewthuh paidbah ïa ka jingnoh synñiang ïa ki dkhot met ka long kaba dang duna bha bad kum kine ki workshop ki long kiba kongsan ban ai jingtip bad ban pynsngewthuh ïa ki paidbah bad ban weng ïa ka jingbym ngeit ka jongki bad ïa ki jingsngewthuh bakla hynrei ban pynshlur ïa ki paidbah ba ka jingnoh synñiang ka jongki kan long pat ka jingïada ïa ka jingim jong kiwei pat” ula bynrap.