Nongstoiñ, Rymphang 24 : Uwei u rangbah briew u ba la tip kyrteng kum u Dominik Marweiñ u ba shongkha ha ka shnong Proiñ ha ki thaiñ jong ka Mawshynrut Block, la ong ba u la kam ïalade kum u ba lah ban pynïoh kam sorkar ïa u bah Sunday Rimait da kaba u la shim ruh ïa ka pisa haduh 20 hajar tyngka.
Haba ïadei bad katei ka jingjia, u bah Sunday u la leit ban ujor sha ka seng HNYM bad ka seng hapoh ka jingïalam jong u bah Tailan Lyngkhoi President HNYM West Khasi Hills District, ka la leit mar mar ban wad ïa utei u briew ha ïing sah jong u bad la ïoh ban kem ïa utei u briew.
Mar ia poi ka seng utei u bah Dominik u la sdang ban kren kyllaiñ, hynrei tang hadien katto katne por utei u briew u la pyndem tdong bad u la phla noh ïa ka jingshisha ba u la shim ïa ka pisa na u bah Sunday.
U la kular ruh ban siew noh hapoh ka shitaïew da kaba ïa kular ruh lyngba ki jingïathoh soskular bad u la soi ruh ïa la ka kyrteng ban pynshisha ha khmat jong ka seng HNYM West Khasi Hills.
Ka seng ka la kyntu ruh ïa ki paidbah ba kin long kiba husiar na ki briew kiba kular ïa kiei kiei bad ban shu ngeit khlem da wad bniah la ka long ne em kaba shisha.
