Nongstoiñ, Rymphang 25: Ka jingmlien kaba sinew ban thang bad wiang ding ïa ki lum bad ki khlaw ki btap ka ktah ïa ka mariang, ki sawdong sawkun, ki mrad ki mreng, ki jingthaw kiba im bad ha kajuh ka por ka pynjakhlia ruh ïa ka lyer, ka buh jingma ruh ïa ka jingim jong ki briew, ki mar ki mata, ki jingri jingdup bad la lap khah khah ba ki briew ki mlien bha ban wiang ding ïa ki lum bad ki khlaw ki btap kiba don hapoh West Khasi Hills District kum ka Mawlangkhar, Mawpun. Nongkhnum bad kiwei pat ki jaka.
Kumta, khnang ban teh lakam ïa kane ka jingmlien kaba sinew bad ban ïada ïa ka mariang, u District Magistrate West Khasi Hills District Nongstoiñ, Bah. Garod L.S.N. Dykes, IAS, hapoh ka kyndon144 CrPC, u la pynmih ïa ka hum ban mana bad khang pyrshah ïa ka jingwiang ding ïa ki lum bad thang ïa ki khlaw ki btap, ki jaka rep ki jaka riang, ki park bad kiwei kiwei de ki jaka kiba don hapoh West Khasi Hills District.
Kane ka hukum kan treikam beit kumne tat ynda la pynbna da kumwei pat. Lada lap ïa kiba ïaleh pyrshah ïa kane ka hukum kin sa shah pynshitom katkum ki kyndon jong ka aiñ.
