Shillong, Rymphang 22: U Bah Adelbert Nongrum, MLA ka VPP na North Shillong, mynta ka sngi u la wanrah da ka Privilege Motion ha ïingdorbar Thawaiñ ka jylla ha kaba ïadei bad ka jingshah kyntait ka Special Motion jong u ban ïakren halor ka CAG Report.
Lah ban kdew hangne ba ka CAG Report, kadei ka Report jong u Comptroller and Auditor General of India halor ki jingkheiñ jingdiah jong ki tnad treikam sorkar bapher bapher ha ka jylla. Ïa kane ka report la ju wanrah man la ka snem ha ïingdorbar thawaiñ jong ka jylla.
U Bah Nongrum, u la ong kane ka jingbym pynrung u Lamphang ka ïingdorbar ïa kane ka Special Motion jong u, kadei ka jingshah pynduh ïa ka hok jong u kum u nongmihkhmat ba la jied da ki paidbah ban kren ha ïingdorbar. Shuh shuh u la ïathuh ba ka jubab kaba u la ïoh na ka ophis jong u Lamphang, ka long ba u Myntri Rangbah, u Conrad Sangma, u la pyntip ba ïa ka CAG Report mynta ka dang don hapoh ka jingpeit bad jingbishar bniah jong ka Public Account Committee (PAC) kaba dei ka rukom ba ju leh haba wanrah ïa ka CAG Report.
Da kaba kdew ruh ïa ki kyndon bapher bapher jong ka rukom pynïaid ïingdorbar, u MLA ka VPP u la ong ba kam don ha kano kano ka kyndon ba ym lah ban ïakren hapoh ïingdorbar halor ka report jong u CAG. Hynrei tang ka rukom ne kata ka convention. “Ngam lah ban sngewthuh kumno ka rukom ba ju leh kan kham lah ban ïa ki rukom ba ju leh”, la ong u Bah Adelbert.
Hadien kane, na ka liang u Lamphang, u la tyrwa hakhmat jong ka ïingdorbar la kan pdiang ne em ban ïatai ïa ka Privilege Motion. Na ka liang ka ïingdorbar ka la kyntait lyngba ka voice vote.
