Shillong, Rymphang, 17: Ka Indira Gandhi Cultural Centre (IGCC) ryngkat ka jingïatreilang bad ka High Commission ka ri India sha Bangladesh lem bad ka tnad Arts and Culture jong ka Sorkar Meghalaya bad ka Bangladesh Shilkapala Academy (BSA), Dhaka ki la pynlong ïa ka Cultural Programme kum shi bynta ban ai burom ïa u Syiem Tirot Sing u Khlawait ka ri Khasi.
Kane ka jingaiburom ïa u Syiem Tirot Sing ka long hadien ba ka Sorkar Meghalaya ka la trei shitom ban pynieng ïa u durmot jong une u Syiem ka Hima Nongkhlaw ha phyllaw jong ka Indira Gandhi Cultural Centre (IGCC), Dhaka ïa uba la plie paidbah da u Symbud Myntri Rangbah ka Jylla u Bah Sniawbhalang Dhar hynnin ka sngi Thohdieng.
Ïa ka Cultural Programme la pynlong ha Jatiya Natyashala Milanayatan, Bangladesh Shilpakala cademy, Shegun Bagicha, Dhaka ha ka sngi Thohdieng.
Ha kane ka sngi, la sakhi lang da u Symbud Myntri Rangbah ka jylla u Bah Sniawbhalang Dhar, ki Myntri Sorkar ba kynthup ïa u Bah Paul Lyngdoh bad ka Dr. Mazel Ampareen Lyngdoh, u High Commisisoner ka India u Pranay Verma, ki MDC ka KHADC, ki Syiem bad ki Syiem Khynnah jong ka Hima Nongkhlaw, Hima Bhowal bad Hima Khyrim bad kiwei kiwei.
