Shillong, Rymphang, 17: Ha ka sien banyngkong eh ki samla na kane ka jylla Meghalaya ki la leit ban ïashim bynta ha ka Bungy Jump, ka jaka kynthih kaba don ha ka shnong Kushma, Nepal, kaba jrong kumba 228 meter bad kaba wan ba-ar ha ka pyrthei ha ka jingjrong jong ka riat.
Kine ki lai ngut ki samla ki dei kiba sah ha ka shnong Lumshyiap, Shillong ba la tip kyrteng kum u samla Banpynbiang Marweiñ, u samla Francis kharmuti bad u samla Lucky Nongspung dang ha kine ki khyndiat sngi ki la leit sha ka ri Nepal ban leh ïa kane ka Bungy Jump.
Ha shwa ban leh ïa kane ka Bungy jump, kine ki lai ngut ki la hap ban leh ïa ka test hashwa ba kin ïoh ïashim bynta bad lada shem ba ki nongïashim bynta ki long kiba biang nadong shadong ha ka koit ka khiah, hadien kata, kin hap ban siew ïa ka pisa kaba 9 hajar tyngka ban ïoh ïashim bynta najrong riat da kaba shu teh da u tyllai uba rben na shadem.
