Shillong, Rymphang, 17: Kumba la ïaphylliew jingmut bad u Chief Executive Officer jong ka Shillong Cantonment Board bad u Executive Engineer ka PWD Roads Shillong Central Division ha ka Sngi Saitjaiñ na ka liang u MLA bad u Chairman ka MTDC u Bah Sanbor Shullai la pynlong ïa ka jingleit jurip lang khnang ban ïoh sdang noh ka mang tyngka ïa kiba bun ki kam hapoh ka South Shillong Constituency.
Kane ka jingleit jurip ka la long na ka bynta ban tei kaba kynthup ïa ka jingpynheh, jingsiang rong ïa ka surok ka ban pynïasoh na ka surok PWD kaba lah don lypa lyngba ka Rilbong Community Hall shaduh ka surok Umshyrpi ka surok PWD jong ka Rilbong Shillong.
Ha kane ka jingleit jurip na ka liang u MLA bad ki heh ophisar ki la leit ruh ban jurip ïa ka jingtei ïa ka Aqueduct Channel ha surok ka Kench’s Trace na Bishnupur Taxi Stand kynthup ïa ka surok ba pynïasoh shaduh Bethesda Hospital Kench’s Trace Shillong.
Haba ai khublei ïa ka tnat PWD Roads ba ka la shim khia naduh u snem ba la dep ban pynkhreh ïa ka DPR sha ka sorkar, u Bah Sanbor Shullai u la ai khublei ruh ïa u Myntri ka tnat ki Kam Pohïing bad uba bat ruh ka tnat PWD Roads u Bah Prestone Tynsong bad u Myntri Rangbah ka jylla u Conrad Sangma kiba la pynïoh ïa ka jingmang pisa ïa kine ki projek.
“Kan long kaba eh bha ban ïoh ïa ka jaka na ki shipai bad mynta kan long ka jingkmen ba ka Tnat ki Kam Ïada Ri (Defence ministry) kaba la mynjur ban ai ka jaka ki shipai na Rhino museum ba la ïakhun napoh ka defence ministry ban ïoh shna noh ïa ka surok ban mih sha Umshyrpi kaban pynsuk ïa ki kali rit kiba na Laban konstitwensi kiba kwah leit sha Upper Shillong ne sha Guwahati lada ka don ka jingdheng kali na ki thaiñ jong ka 101 ter ter,” ong u Bah Sanbor.
U la ai khublei ruh ïa u Myntri ka tnat Ïada Ri u Rajnath Singh uba la ai hukum sha ka Cantonment Board ba kadei ban ai jaka na ka bynta ka suk ka saiñ ki paidbah.
“La donkam ban siew T. 1.69 Lak ïa ka bai jaka sha ka Cantonment Board bad mynta la ïoh ka NOC ban ïoh ïa sdang noh ïa ka jingshna ka surok na Umshyrpi ban ïoh myntoi ki nongshong naduh Lawsohtun ban leit sha upper Shillong bad Guwahati.
“Ka shim por haduh 9 bnai ban ïoh ka NOC na ka defence. Ïa ka Umshyrpi ka skhim ba la mang ka long T. 3.61.klur katba ïa ka surok bad ban shna ïa ka Aqueduct Channel ha surok ka Kench’s Trace na Bishnupur Taxi Stand, nangta ki nala bad hapoh kane ka surok yn thep ïa ki pipe um ka jingmang pisa ka long T. 2.34 klur bad kane kan sdang naduh Sankerdev shaduh Bethesda,” ong u MLA.
U la ong ruh ba na ka liang ka shnong Kench’s Trace hapoh ka jingïalam u Bah K Nongbri, ha ka jingïalang ki la rai ba ka shnong kan ai ka jingïatreilang kaba pura bad ka PWD bad kumjuh u MLA ban ïatreilang.
U la ïathuh ba ka por ban pyndep na ka bynta ka surok Aqueduct ka kam kan sdang noh ha une u taïew bad yn pyndep hapoh ki 18 bnai, katba ïa ka surok na Umshyrpi kan long hapoh ki 24 bnai.
Ha kane ka jingjurip la ïadonlang u EE ka PWD Roads u Bah Joel Marbaniang, u CEO ka Shillong Cantonment Board u Aayush Moria nalor kiwei pat ki Engineer ka PWD.
