Shillong, Jymmang, 19: Ki dohkha dohpnat ki la sdang ban mih biang ha Wah Umsohlang hadien ba la pynkhuid ïa kane ka wah da ka jingshimkhia jong ka Bio Diversity Management Committee, Kynton Massar.
Ha ka jingleit ïaid kai jong u nongthoh khubor shajan kane ka wah ha ka sngi Palei la lap ba kane ka wah kaba la pynlang ïa ka um ban tan sha ka shlem sam um jong ka Umsohlang Water Supply Scheme jong ka tnat PHE ka la khuid biang khlir khlir kum ha ki por ka mynnor.
La lap ruh ba ki jabah jabaiñ, naduh ki bilor, ki plastic bad kiwei kiwei ki jaboh ba la satah ha kane ka wah kum ka ahor ha ki por ba la leit noh la khat bad la pynkhuid da ki dkhot jong ka Bio Diversity Management Committee, Kynton Massar khnang ban pynim bad ban pynneh pynsah ïa ka jingkhuid jong kane ka Wah. Sa ka jingther jong u lapbah u lapsan ha kane ka aiom lyiur ka la iarap bha ia ki dkhot jong ka Committee ban pynkhuid kane ka wah naduh ki bynta kiba shaneng jong ka Wah kaba tuid na syndah ka kynroh jong ka skulbah NEHU ter ter.
Dang ha ka 7 tarik mynta u bnai u Myntri Rangbah ka Jylla u Conrad Kongkal Sangma lem bad u MDC ka Mawlai Constituency u Bah Teiborlang Pathaw da lade ki la hiar ban leit tong ïa ki jaboh jabaiñ kiba don ha kane ka wah da kaba shong da ka lieng kynda ba la pynkhreh da ka Dorbar Shnong Kynton Massar.
Ki nongkitkam jong ka Bio Diversity Management Committee, Kynton Massar ki la buh hakhmat ïa ka thong ban pynkylla dur biang ïa ka Wah Umsohlang kaba la jngut bad kaba la dap da ki jaboh jabaiñ ba la pyntuid da ki briew na wahduid kiba tuid na ka shnong Mawkynroh, Umshing bad na ka shnong Mawroh.
Ban ïada na ka jingbret jaboh pathar jong ki nongleit nongwan sha ka wah, ka Bio Diversity Management Committee, Kynton Massar ka la pynieng ruh da ka jar nar ha jingkieng kaba pynïasoh ïa ka shnong Mawkynroh bad Kynton Massar.
U Secretary ka Bio Diversity Management Committee, Kynton Massar u Bah Franco Syndor ha ka jingïakren bad u nongthoh khubor ula ïathuh ba ki dohkha kiba heh haduh 3 kilo tam eiei kiba don mynta ha kane ka wah Umsohlang ki dei kiba la im naduh mynshwa bad dang ha ka sngi saitjaiñ ba ladep ka Dorbar Shnong Kynton Massar ka la theh dohkha biang ha kane ka wah haduh 40 kilo.
