Dang ïaid ka jingïapynbeit hapdeng ki MLA ka UDP bad ki nongïalam ka BJP ha Delhi

Shillong, Nailar 30 : Ka jingïakren bad ïa pynbeit hapdeng ki MLA ka UDP bad ki Nongïalam ka BJP ha nongbah Delhi na ka bynta ban pynïasoh noh sha katei ka party ka dang ïaid mynta bad la ïoh jingtip ba mynta ka sngi ka dei ka sien ba ar ban ïakynduh bad ïakren hapdeng ki arliang mamla.
La ïathuh ba ka jingïïakren ka long beit halor ka nongrim ba ki 8-9 ngut ki MLA ka UDP kin pynïasoh noh sha ka BJP ha ki khyndiat por ban wan. Ka jingïapynbeit kumba long mynta ka long na ka bynta ka jingïoh bhah ïa ki shuki myntri ha kane ka sorkar MDA.
Namar lada 8 haduh 9 ngut ki MLA ka UDP kin pynïasoh shaka BJP kaba mut ka BJP kala kot sha ka 10 lane 11 ngut ki MLA namar arngut ki la don lypa kata u bah Sanbor Shullai bad u bah A.L Hek. Kane ka mut ba ka BJP ka la wan ba ar ha ka jingbun paid ha kane ka sorkar synrop lang MDA.
Shuh shuh kumba ka long ka UDP mynta ka don 12 ngut ki MLA bad ka don kam 8 haduh 9 ngut ba kin lah ban mih ban lait na kyndon aiñ Anti Defection Law.
Haba pyrshang ban ïakren bad u bah Paul Lyngdoh halor kane ka jingkhreh pynïasoh sha ka BJP ne NPP na ka liang jong u bah Paul u la ong “ Halor kane ngam pat shim ïa kano kano ruh ka rai namar nga dang ïamir jingmut bad twad jingmut shwa na ki Nongïalam bad ki Nongkyrshan jongka West Shillong Constituency bad dei tad hadien kata nga lah ban shim ïa kano kano ka rai da ka jingmynjur lang jongki”.
Nalor kane la ïoh jingtip ruh ba arngut na ki MLA ka UDP ki lah ban leit pyniasoh noh sha ka NPP tangba kane ka lah ban long hadien ba kitei kiba bun ki la dep ban pynïasoh sha ka BJP.