Ki 4 ngut kiba kyllon ïap ha ka jingïasiat ha EGH ki dei kiba thmu rahbor ïa ki heh ka NHIDCL
Kyllon ïap 4 ngut ki riewkieng atiar ha ka jingïather kuli bad ki pulit ha ri lum Garo
Shillong, Nailar 30 : Ki 4 ngut ki riewkieng atiar ba kyllon iap ha ka jingïather kuli ha East Garo Hills, ki dei ki runar kiba thmu ban rahbor ïa ki Heh ka National Highway & Infrastruture Development Corporation Limited (NHIDCL) ban ïoh dawa pisa.
Kine ki runar ki kyrteng u Alason Marak uba dei na Mendima, North Garo Hills, u Sustom Rabha uba dei na Goalpara, Assam, u Kalam Ali uba dei na Goalpara, Assam bad u Bobidul Islam ba na Goalpara, Assam.
U Superintendent of Police ka East Garo Hills Pawar Swapnil Vasantrao, u ïathuh ba u Alason Marak u dei uba donkti hakhmat eh ha ka jingïather kuli ha Damra kaba lam sha ka jingiap jong uwei u nongkhaïi.
U Sustom Rabha u dei uba la don bun tylli ki case kam bymman bala register ha Assam bad Meghalaya, khamtam ha Dudhnoi, Mendipathar bad Dadenggre Police Station, kiba kynthup ïa ki kam tuh, kam rahbor, bad kam kieng atiar.
U Kalam Ali u dei uba don bynta ha ka case ka Krishnai PS hapoh ka kyndon rahbor, dawa pisa, shoh briew bad set jubor ïa ki briew.
Katba u Bobidul Islam ruh u dei uba donkti ha ki kam bymman. Na ka met jong ki saw ngut la ïoh ban kurup ïa artylli ki pistol shna hi nalor ki kuli ki bym pat bthei bad kiba la bthei, kiba la pyndonkam haba siat sha ki Pulit.
U SP u pyntip ba ki Pulit kila ïoh ïa ka jingtip halor ka jingïaid kine ki runar sha Songsak, East Garp Hills ban rahbor ïa ki nongtrei ka NHIDCL bad mar mar, ka kynhun ki Pulit bala ïalam da ki Ophisar bad ki Anti Terror Squad (ATS) ryngkat ki Pulit ka East Garo Hills bad Songsak Police Station, kila pynlong ïa ka jingap shrip ha Songsak Reserve ban ïoh bat ïa kine ki runar.
U ïathuh ba dei ha ka por 4 baje mynstep, ka Bolero ba don u nombor AS01-FD-2889 kala wan bad haba ki Pulit ki la pynïeng ban talasi, kine ki runar kila ther kuli sha ki Pulit da kaba pyndonkam ïa ki pistol shna hi. Ki pulit ki la pynphai markylliang bad ha kane ka jingïather kuli, baroh saw ngut ki la mynsaw ba shei kuli.
Hadien bala kut ka jingïather kuli, ki Pulit kila leit talasi ïa ka kali bad ïa kine ki runar la pynkit noh sha Songsak PHC bad hadien la pynkynriah sha Williamnagar Civil Hospital ha kaba u Doktor ula pynbna ba ki la iap ha lynti.