Nongstoiñ, Jymmang, 19: Ka seng HNYM hapoh ka jingïalam jong u bah Tailan Star Lyngkhoi President West Khasi Hills District, ryngkat bad ka shnong Mawphansien kaba kynthup ïa u bah Phangstar Nongsiej Sordar ka shnong Mawphansien bad kiwei kiwei ki dkhot jong ka dorbar jong katei ka shnong, ha ka sngi balang ki la leit ai da ka jingthoh ha u bah F.Sohlang Executive Engineer PWD Road Nongstoiñ Sub Division ha kaba ïadei bad ka jingdonkam jong ka surok.
Haba ïadei bad katei ka phang, na ka liang jong utei u ophisar u la ong ba un pynpoi ïa katei ka shithi ha ki bor kiba halor, namar na ka liang jong u, um lah ban batai ei ei namar kam shong ha ka bor jong u.
Katei ka shnong Mawphansien ka dei kawei na ki shnong kaba la rim bha bad kaba la kynjoh sha ki 60 snem tam ei ei, namar la seng ïa ka ha u snem 1960 ei ei da ka kur Nongsiej nyngkong eh. Ka dei ruh ka shnong kaba hap hapoh ki ar hima ïa kaba la tip kum ka Hima Rambrai-Myrïaw Syiemship.
Ki nongshong shnong jong katei ka shnong kat haduh kine ki sngi, ki dang ïaid da ka kjat ban leit siew leit pet sha sor Nongstoiñ, namar ka jingbym biang jong ka surok. Hynrei ka jingjngai pat ka long kumba 45 minit da ka kjat na Steplanglur sha katei ka shnong Mawphansien.
Ym tang katta hynrei ha katei ka shnong ka light ruh kam don shuh mynta lah kumba 8 snem ei ei, naduh ba la duh ka transformer bad kat haduh mynta ym pat shym la ïoh da kawei pat bad ki dang shong dum beit ngaiñ ngaiñ.
