Nongpoh, Rymphang 11 : Ka Ri-Bhoi Tourism and Environmental Development Forum kawei naki seng kaba ju kyntiew ïaki kam jngohkai pyrthei ha Ri-Bhoi hynin ka sngi kala pynlong da ka jingïaid kjat sha Pnah kyndeng kaba dei ka Law kyntang kaba don ruh ka krem Lymbit haka shnong Pahamskhen ban dang kyntiew shuh shuh ïa katei ka jaka kum kawei naki jaka jngohkai pyrthei ha Ri-Bhoi District khamtam ka jingdon jong ka mei mariang bad ki sawdon sawkun kaba itynnad.
Ïa katei ka jingïaid kjat la sdang naduh ka shnong Pahambir haka jingjngai kumba 5 km eiei bala snohkti lang haka jingïaid kjat da u Bah Bansynsharlang Nongkynrih Tourist Officer ka Ri-Bhoi District, ki nongïalam ka RBTEDF naduh u Bah Plielad Tiewsoh Chairman, ki nongthoh khubor, ki nongïalam shnong ryngkat ki paidbah na kylleng ki jaka.
Na ka liang u Bah Bansynsharlang Nongkynrih District Tourist Officer ka Ri-Bhoi kum uwei naki nongshimbynta ha katei ka jingïaid kjat bad katto katne ki riew paidbah kila pynpaw ba katei ka jingïaid kjat ka long shisha kaba sngewtynnad ban poi sha kum katei ka jaka kaba ka mei mariang kala ai sha u bynriew ha katei ka thaiñ khamtam ka jingdon ruh ka law kyntang kaba ki paidbah ki dang pynneh pynsah haduh mynta bad nalor ka jingdon jong ka krem lymbit ha katei ka jaka kaba lah ban khring ïaki nongjngohkai pyrthei bad kum u ophisar ba dei peit ïaka tnad jngohkai pyrthei ha Ri-Bhoi u la kyrpad ruh sha ki paidbah ba ki dei ban pynneh pynsah ïa katei ka jaka bad ban pynduna ka jingshna ïaki ïing building kiba lah ban pynsniewdur ïa katei ka jaka.
Shuh shuh ha katei ka lawkyntang ka dei ruh kaba don ka khana namar katkum ka jingïathuh jong katto katne ki riew rangbah la ong ba ka Pnah Kyndeng ka dei kawei naki Lawkyntang jong ka Raid Nonglyngdoh kaba dang heh bad iar ka jaka bad ha kane ka Law Kyntang ka don ruh ka krem ba shong ki labadur lane ki lymbit bad kadei ruh ka krem kaba heh tam, kaba don ruh u Maw synduk, ka jaka lehñiam ki mynbarim, ka khlaw ba rben da ka jingkup ki dieng ki siej, ki syntiew ki skud bad ki jait dawai kynbat ba har rukom.
Ka don ruh ka jingngeit ba ki briew ha katei ka Raid ki ju wanrah ïa u symbai japnah (khawpnah) na kane ka jaka bad ha syndah kane ka jaka ka don ka wah Umngei bad ha katei ka jaka ki khun ki hajar ki ju ngeit ruh ba u don u Ryngkew u ba shong ba sah ban peit bad khmih ïa katei ka law kyntang, shuh shuh la ong ruh ba ka ha katei ka Pnah Kyndeng la ju pynlong ruh ka kñia ka khriam ba shisien shisnem da ka kur Makri hapoh ka Raid Nonglyngdoh da u Blang ba lieh bad u syiar ba lieh ryngkat ka duwai ka phirat, naka bynta ka jingkyrkhu ïaki khun ki hajar hapoh ka raid.
La mana ruh ba ki paidbah kiba leit kai sha katei ka jaka kim bit ban leh kulmar, ban kren ki ktien khlem akor, ne leh khlem akor bad ban leh jakhlia ha katei ka jaka namar kadei ka jaka ba la kyntang bad la ngeit ruh ba ïa katei ka jaka la ri bad sumar ruh da u ryngkew u basa ba shong ba sah ha katei ka jaka.
