Ban lait na ka kyrduh bam ban jur ban pynmih da ki symbai ba seisoh

Shillong, Jymmang 18 : U Myntri ka sorkar pdeng uba dei peit ïa ki kam pynroi nongkyndong (Rural Development) bad Panchayati Raj u Giriraj Singh ha ka jingwan jngoh jongu ïa ka Indian Council of Agricultural Research (ICAR) Complex ha Umiam kaba dei peit ïa kane ka thaiñ shatei lam mihngi ka ri India u la ban jur ïa ka jingdonkam ban wad bniah ban pynmih ïa ki symbai kiba seisoh bun shah khnang ban lait na ka jingkyrduh bam namar kumba long ka India ka don hapdeng ka jingma na ka jingkyrduh bam namar ka jingkiew ka jingbun briew jongka.
Ha kane ka jingwan jngoh ïa ka ICAR u la leit ban peit ïa ka jaka ba pynkha khun ïa ki sniang da kaba pynshongkha khleh ïa ki hadien ba la dep wad bniah bha da ka ICAR.
La synran ïa u da u DC ka Ri Bhoi u Arpit Upadhyay bad u Giri Prasad M SP jongka Ri Bhoi.
Haba kren hak a jingïalang kum u kongsan u Giriraj Singh u la ong “ Ka don ka jingma ba lah ban duna ka bam ha ki snem ki ban wan namar ka jingnang kiew ka jingbun paid ha ka ri. Nga pynkynmaw ïa phi ïa ka Green Revolution ha ka ri hynrei haduh mynta ngi dang donkam ban dang pynmih bun ki mar bam bad kumta donkam ban ïoh ïa ki symbai kiba seisoh kham bun shah ban lah ban pyndap ïa ka bam”.
Ka donkam ruh ka jingïatrei lang ban wanrah ïa ka roi ka par ha ka district hi baroh kawei. Kumta u la kyntu ïa ka ICAR bad ïa ka College of Agriculture University ba kin ïatrei lang bad wad bniah ïa ki jingdonkam jong ki nongrep kumno ban kyntiew ïa ki ha ka rep ka riang. Dei ban shim khia bha ban phai khmat ha kaba wad bniah naduh ki jaka wad bniah ( lab) bad ban pyntreikam ïa kajuh ha ki jaka rep jaka riang.U la ban jur ruh ban pynkhlaiñ ka jingrep Moringa namar une u jait jingthung u khlaiñ bha ban kjit ia ka carbon.
U la ong ruh ba ka ri bad ki nongkyndong kin kiew bad riewspah tang lada ki nongrep ruh ki riewspah kata ka mut lada ki ïoh nong bha na ka rep ka riang jongki bad pyndonkam shuh shuh ïa ka jingmih ha kaba pynkhlaiñ shuh shuh ïa ka rep ka riang.
Ki saiantis bad ki nongtrei jongka ICAR bad CAU ki la ïoh ruh ban ïamir jingmut bad u Myntri ha ka janmiet 17 tarik halor kiba bun ki mat kiba ïadei bad ka rep ka riang bad ka ri jingri.