Kumno ngin ïasoi ïa ka MoU bad ka Assam haba ïa ka ishu Block-I ngi dang ïakren: Sniawbhalang Dhar
![](https://mawphor.com/wp-content/uploads/2024/02/MoU-.jpg)
Shillong, Rymphang, 05: U Symbud Myntri Rangbah ka Jylla Bah Sniawbhalang Dhar uba khmih ïa ka tnat Pynroi Sor bad uba dei ruh u Chairman jong ka Regional Committee na ka bynta ka West Jaiñtia Hills District ha ka Lah Sngi u Blei u la ong ba ka jingong ban ïasoi ïa ka Soskular bad ka Assam kam pat don jingmut satia namarba ïa ka ishu pynbeit pud ba ïadei bad ka Block-I ka dang don ha ka lynti jong ka jingïakren.
Ha ka jingïakren bad ki lad pathai khubor u Bah Dhar u la ong ba kane ka miat ka dei kaba la ïakren lang da ki ar tylli ki Jylla.
“Lada dei ban hap ïasoi kano kano ka soskular, ngi hap ban ïasyllok lang ïa ki paidbah nongshong shnong jong ngi na kato ka thaiñ bad ka jingong ba ka jingïasoi soskular kam pat don jingmut satia namarba ka dang don hapdeng ka jingïakren,” u la bynrap.
Kane ka jingpynshai u Symbud Myntri Rangbah ka long hadien ba ka Hynniewtrep Border Disputes Redressal Forum (HBDRF) dang shen ka la kyntu ïa ka Sorkar Jylla ba kan ym ïasoi ïa kano kano ka Soskular bad ka Sorkar Assam lada ka kyntait ban pynphai biang ïa ka Block-I sha ka Meghalaya.
Halor ka jingïakynduh biang jong ki Regional Committee, u Bah Dhar u long ba ka Regional Committees jong ki ar tylli ki jylla kim pat lah ban ïakynduh namarba ki dang bunkam bad ka elekshon Lok Sabha.
Haba kylli, u Bah Dhar u la ong ba ka kaiphod jong ka Regional Committee ym pat dep satia ban phah sha ka Sorkar.
“Kane ka dei namar ba ka dang don ka jingbishar jong u Deputy Commisioner ïa u laiñ khappud, ngi dang pyrshang ban wad sa katno tylli ki shnong kiba la shong la sah da ki Khasi bad katno tylli ki shnong ba la shong la sah da ki Karbi. Kata ka jingbishar ka dang ïaid mynta,” u la ong.
Ha kaba ïadei bad ka jingshimpor ban pynkynriah ïa ki briew kiba sah ha Them Iewmawlong, u Bah Dhar u la ong, ba ka Sorkar shen kan sa khot ïakren biang sa shi wat ïa ki nongïalam jong ka Harijan Panchayat Committee (HPC) ban shim ïa ka rai kaba khatduh halor kane ka kam.
U la ong ba ka Sorkar ka la pyrshang katba lah ban pynkut noh shisyndon ïa kane ka kam hapoh une u snem.
Katkum ka jingong jong u, kim don shuh kino kino ki jingeh namarba ba ki arliang mamla shen kin sa ïakynduh biang sa shi wat.
“Ka Ingbishar ka la ong sngewbha ban ïapynbeit noh ïa ki jingeh namarba ngi dang don ha ka kamram ban weng ïa ka jingeh hapdeng ka Sorkar bad ka HPC,” u la ong.