Hap ban ai jingïaroh ïa ka Sorkar Meghalaya Democratic Alliance hapoh ka jingïalam jong u Conrad K. Sangma kaba la wad ïa ki lad ki lynti bad kaba la shimkhia ban wanrah ïa ka Riverfront Development Project ba 39 klur ban pynkhuid ïa ka Wah Umkhrah. Kumta ki paidbah nongshong shnong ki dei ban ïatreilang bad ka Sorkar ban pynkhuid ïa kane ka wah kaba la ijli sat ban peit bad kaba la pynmih ïa ka jingsma iwtung namar ka jingleh sat jong ki nongshong shnong kiba pyntuid ïa ki jaboh jabaiñ sha kane ka wah khlem ka jingïatiplem ban ïada ïa ka jingkhuid jingsuba jong ka wah.
Toi, watla ki don ki kynhun ieid mariang kiba ju shimkhia ban pynkhuid ïa ka wah Umkhrah, hynrei ka jingeh ka long ba ki shnat wah kiba tuid sha ka Wah Umkhrah ki dei kiba la pyntuid um jaboh na ki thliew iing jong ki briew bad ka jingbret jakhlia jong ki paidbah ka la nang kynton shuh shuh ïa ka jingjaboh jong ka wah.
Lehse, bun ngim ïohi shuh ïa ki shnat wah ne ki wahduid kiba lynsher ïalade sha Wah Umkhrah namarba la siang dewbilat nalor kine ki wahduid ban pynsuk ïa ka leit ka wan jong ki paidbah. Dei kane ka daw kaba pynlong ïa ki wahduh ban kylla long ki nala pyntuid jakhlia bad ban kylla nala bret ñiut.
Ka Khasi Hills Autonomous District Council, ha ki snem ba ladep ka la wanrah ïa ka projek ban pynkhuid ïa ki jakhlia ha Wah Umkhrah kaba kot 1.3 klur hynrei kam shym la don satia kano kano ka jingkylla dur ha kane ka wah.
Ka KHADC ka la mang ïa ka pisa na ka 13th Fince Commission jong u snem 2011-12 (1 klur), 2012-13 (15 lak ) bad 2013-14 (20 lak). Ki don 32 tylli ki shnong la ïoh ïa ka mang pisa kaba T. 9, 40, 000 lak na ka bynta ban shna ïa ki waste trap ne ki jingset jaboh, ki kynroh bad kiwei kiwei.
Watla ka jingpynkhuid ïa ka wah ka la sdang ha ka 26 tarik Ïaiong, 2013 hynrei ka Executive Committee kam shym la buh ïa ka thong ban pyndep ïa ka projek. Kaba kham thamula ka long ba ki MDC ki dang ïashim bynta ban pynkhuid tang shisien bad la pynlut pisa ruh 6 lak na ka bynta ban thied ïa ki tiar ki tar bad na ka bynta ka bai trei. Ka jingthmu ban pynkhuid ïa ka wah Umkhrah ka la sdang na Umkaliar ter ter shaduh Jingkieng Mawlai. Hynrei na ka daw ka jingbym ïoh pisa shuh hadien habud na ka 13th Finance Commisision ka KHADC kam shym la lah shuh ban bteng ïa kane ka projek ban pynkhuid ïa ka wah Umkhrah.
Kaei kaba la jia ïa ka District Council, kam dei pat ban jia ïa ka Sorkar namarba ka Riverfront Development Project ba 39 klur ka dei kaba la mang pisa da ka Sorkar India. Lada ka Sorkar India kam ai pisa shuh ïa ka Sorkar Jylla ban bteng ïa ka jingpynkhuid ïa ka wah Umkhrah khlem pep kan buh jingeh ïa ka Sorkar bad ïa ki shnong kiba la pyntrei ïa ka projek.
Ha kawei pat ka liang, ka Sorkar ka dei ban shimkhia ban pynkhuid ruh wat ïa ka Wah Umshyrpi kaba la jaboh haduh katta katta. Haoid, watla ka Sorkar kam shym la ïoh pisa ban pynkhuid ïa ka wah Umshyrpi hynrei ka dei ban thaw ïa ki lad ki lynti na ka bynta ban pynïoh pisa na ka bynta ban pynkhuid ïa kane ka wah, kaba tuid arsut sha pung Umïam.
Sa kawei pat ka thong kaba sorkar ka dei ban buh hakhmat ka long ban ïada ïa ka jingkhuid jong ka Wah Umkhen. Kane ka wah ka dei kaba kongsan haduh katta katta namar ka dei tyllong um bam umdih jong ki paidbah ka New Shillong.
Ïa ka wah Umkhen la pyndonkam da ki 20 tylli ki shnong kiba la don lypa ha New Shillong bad lada kane ka Wah ka jaboh kan buh jingeh hi kumjuh ïa ka sorkar hadien habud kumba la jia ïa ka wah Umkhrah bad ka Wah Umshyrpi.
