Nongstoiñ, Rymphang 3: La bun bun snem ki nongkhaïi kiba dei ki bar jylla, ki la ïohlad ban rung katba mon ha ki shnong ki thaw hapoh West Khasi Hills District. Kiba kham bun ki jaka ba kitei ki bar jylla ki ïoh ban rung laitluid ki dei ki shnong kiba hap hapoh ka Mawshynrut Block.
Katei ka jingïoh ban khaïi da ki bar jylla ka pynduh nong shibun ïa ki nongkhaïi kiba dei ki trai shnong, namar ba kitei ki bar jylla tang ban lut ka mar ki die ha ka dor kaba bit namar ban pynphai ruh ki shem shitom.
Ha kaba ïadei bad kane ka bynta, lah ban ong ba ka dei ka jingbym shimkhia jong ki bor synshar shnong. La lap ruh ba ki don ki nongsynshar shnong ba lada don kino kino ki samla shnong kiba kylli ne tohkit ïa kitei ki bar jylla, kim ailad bad kim shah satia.
Ka jingïoh rung laitluid jong kiba kum kitei ki briew ym tang ba ka pynduh nong ïa ki nongkhaïi kiba dei ki trai muluk, hynrei ka buh ruh ïa ki khynnah khunlung ha ka jingma khamtam eh ïa ki kynthei.
Ha kaba ïadei bad katei ka bynta, ki bor synshar shnong ki la dei ban pyrkhing bha ïa kiba kum kitei ki briew khnang ba ki nongkhaïi kiba dei ki trai jaka kin kham kiew ha ka kamai kajih.
La ju iohi ruh na ka por sha ka por ïa ka jingkhynra bar jylla ba la leh da ki sengbalang bad kane ka la long ha kiba bun ki shnong, ha kaba la ioh kem ïa ki bar jylla kiba trei bylla khlem jingpynshisha nangno ki wan. Ka jingkylli ka long haba ki rung bad trei bylla sha ki shnong ki thaw jong ka ri lum Khasi, hato ki bor shnong ki leh aiu ban peit ban jngoh halor kane ka bynta.
Kumta ka por ka la dei ba ki nongsynshar shnong bapher bapher la ka long ha jaka sor ne nongkyndong, ba lyngba ki VDP ki dei ban peit bha halor kane ka bynta, namar ban shu ieh beit kumto tang ha ki sengbhalang ban khynra mynder ka pynpaw pynban ba kim don jingkitkhlieh na ka bynta ka lawei ka ri bad ka jaidbynriew.
