Nongstoiñ, Rymphang, 03: Ha kine ki sngi ki paidbah nongrep synsar na kylleng ki jaka jong ka West Khasi Hills, ki la sdang phuh mut phuh mat bha namar ka ïew thied synsar ka la sdang thnem, kat haduh ba ki mahajon kiba thied na ka bynta ban shalan sha kiwei pat ki jaka ki la ïabeh sha ki nongkyndong ban ïaknieh dor.
Ki nongrep synsar na ki bun tylli ki shnong haba ïakren bad u nongthoh khubor mynta ka sngi, ki la ïathuh ba naduh ka taïew ki nongthied synsar ki la wan sha ki shnong ki thaw jong ki ban lum ban lang ha ka dor kaba bit.
Ki la ïathuh ruh ba kitei ki nongthied haba ki la ïoh lum ban pyndap tang shi Mahindra Pick up, ki la phah kit noh wut wut ban pyn poi sha iew die lang ha Shillong.
Ki la ïathuh ba ha kine ki sngi wat na ki jaka ba jngai kum na ki thaiñ Langpih, Riangdo bad kiwei kiwei ki jaka, ka dor ka mur jong u synsar ka bit ka biang bha bad kane ka pynphuh mat na ka bynta ki nongrep na kine ki jaka kyndong jong kane ka District.
Hynrei, ki dang don ruh ki nongrep synsar kiba la pynpaw ïa ka jingartatien, da kaba ong ba ha ki snem ba la dep ka ju jia ba shisien ba ka dor ka heh bha ha ka por ba dang sdang pynmih, kam ju neh slem bad haba ka la hiar ka dor, lada leit die sha Shillong tang ka bai kit kam mih satia.
Ki la ong ba kumba ka sorkar ka la ithuh ïa u synsar kum u mar rep, ka la dei ban thaw noh da ka polisi kaba biang ban pynneh ïa ka dor ka mur ha baroh shi samoi, khnang ba kan kyntiew ïa ka ïoh ka kot bad ka kamai kajih jong ki paidbah.
