Nongstoiñ, Rymphang 3: Ka KSU Lyngngam Hynnengbrei Unit ha ka taiew ba la lah, ha ka jingïalam jong u Samla Banshan Sohbar general secretary, u Samla Jonathan Puweiñ finance secretary bad ki dkhot, ka lah ïoh ban leit noh synñiang ïa kawei ka ïing ba shem lanot pluh ïing ha Miangmawdar ba dei jong I Kong Emo Puweiñ.
Keng kam shym lah ïoh ban ïakynduh markhmat ïa ki kmie ki kpa namar ba ki leit shim dawai sha bar jong ka shnong. Kumta ka seng ka lah aiti ïa ka jingnoh synñiang ha ki khun bad ha ka jingdon lang ki riew rangbah jong ka shnong.
Haba ai jingkren na ka liang jong u General Secretary ka Seng, u pynpaw ïa ka jingsngewsih ïa ka jingduh noh jong ki ïa ka ïing ba ki sah. Shuh shuh u pynpaw ruh ïa ka jingsngewnguh ïa Blei ba ym shym lah don ba mynsaw ne ka jingjia ba sngewsih ha katei ka jingpluh ïing.
U la pynpaw ruh ba na ka liang jong ka Seng kan ym don shibun ban ïarap. Hynrei ki noh synñiang kat kaba lah ha I bor barit jong ki, kum ka dak ban don lem don ryngkat bad kiba shem jingjynjar.
Ka Seng ka buh ruh ka jingkyrpad ïa ki bor ba dei peit ban leh kham kloi ïa ki lad jingïarap, khnang ba kin ïoh ban maramot noh kham kloi ïa kaei kaba la duh. Na ka liang jong ka seng ka la kular ruh ba kan ïai buddien haduh ba kin ïoh ïa ki lad jingïarap.
