Shillong, Rymphang, 02: Ka Employment Cell jong ka Khasi Students Union ha ka sngi Thohdieng ka la aiti da ka dorkhas ha u Myntri ka tnat Bording u Abu Taher Mondal halor ka jingsah pongding ka jingthungkam na ka bynta ka kam Assistant Engineer (Electrical/ Mechanical) bad ka jingthud treikam jong ka Meghalaya Energy Corporation Limited (MeECL).
Katkum ka dorkhas ba ka KSU ka la aiti sha u Myntri, ka la pynpaw ba ka kyrteng jong ki nongthep kam kiba la pyndep ïa ka Written Test na ka bynta ka post Assistant Engineer la pynlong da ka MeECL ha ka 13tarik, Naitung, 2019 bad la pynmih paidbah ïa ka Result ha ka 19 tarik,Nailar 2019 katba ïa ka personal interview na ka bynta ki 24 ngut kiba la pas ïa ka written test kaba la buh sngi ban pynlong ha ka 26 tarik Nailar, 20129 la pynsangeh noh da kaba pyntip ba yn sa pynbna pat kham hadien.
“Mynta la saw snem tam ïa ka personal interview ym pat lah satia ban pynlong,” la ong ka KSU ha ka dorkhas.
“Ka Union ha ka 11 tarik, Kyllalyngkot, 2024 ka la phah da ka jingthoh sha u Director (Corporate Affairs), MeECL ban dawa jingpynshai halor ka jingpynslem ïa ka jingthungkam bad ka Union ka la lap ruh ba ka Corporation kam shym la thungkam ïano ïano ruh na ka bynta ka Permanent Post naduh u snem 2019 namar ka jingbym don pisa ban siew sha ki nongtrei,” la ong ka KSU.
Halor kane, u Chairman jong ka Employment Cell u samla Reuben Najiar u la ïathuh ba ka Seng ka la kyntu ïa u Myntri ka tnat Bording ban sdang noh ïa ka jingthungkam ha kine ki post bad kumjuh ruh ïa kiwei post ba dang lait.
