Ki nongïalam bad ki kam shakri
![](https://mawphor.com/wp-content/uploads/2022/02/editorial.jpg)
Kat kum ka jingthmu baroh ki seng ki long hi ban wanrah ka jingmyntoi naka bynta ki babun balang bad ban trei naka bynta ban kyntiew bad peit ia ka jingbit jingbiang jong kano kano ka bynta ha ka imlang sahlang. Ka jingdon jong kiba bun jait ki seng naduh sengbhalang, ki seng niam, ki seng tynrai, seng ki nongkhaii, seng ki nongtrei ophis, seng ki samla pule bad bun kiwei pat ki seng ka long shisha kaba donkam. Hynrei ka long kaba donkam pat ban don ia ki nongialam kiba don ka jinglah ban kit ia ka lyngkor bad ban trei ia ka kam ha ka rukom kaba iaid beit iaid ryntih. Kat haduh mynta ki dang don bun ki jait seng kiba kim shym la ioh satia ia ki nongialam kiba don ka jingtbit namar ba kim shym la ioh ia ka jinghikai kaba biang ha kaba iadei bad ki kam paidbah.
Ka jingdon ki nongialam kiba tbit bad kiba la ioh jinghikai kan iarap shibun ia ka seng ban trei kam kham stet bad ha ka juh ka por kan pynsuk ruh ia kito kiwei pat ki tnad kiba iadei kam bad ki. Ym lah ban len ba na ka liang jong ki seng kmie ne ki Central body ki don hi ia ki nongialam kiba bit ban trei ia ka kam paidbah, hynrei kib a bun na ki nongkitkam jong ki Unit jong ki khamtam kiba dei na sha ki thain nogkyndong ki dang donkam shibun ki jingshah hikai ban pynlong ia ki, kiba tbit ban trei ia ka kam paidbah.
Kumta ka long kaba donkam ia ki seng kmie ne Central Body ban shim khia ban pynioh ia ka jinghikai kaba biang sha ki nongkitkam jong ki tnad ne ki unit bapher bapher. Ki nongkitkam kam jong ki tnad ki donkam ban don ka jingnang kumno ban thoh ia ki shithi sha kito kiba ki donkam ia kino kino ki jingiatreilang ne jingiarap kum sha ki Ophisar sorkar, ki kot khubor, ki tnad pulit bad kiwei pat. Kat haduh mynt dang don bun bah ki nongialam kiba ym tip ei ei ruh em shaphang kane ka kam kaba donkam eh. Bun sien ki wan sha ki ophis jong ki kot khubor ruh ki shu wan buh beit ia ki jingthoh kiba long tang kum ki jingpynbna paidbah ne poster khlem kano kano ka ktien lamphrang ban kyrpad ne iarap pynmih lem ia ki jingthoh jong ki.
Khamtam lei ki nongkitkam jong ki seng ba dei na ki thain nongkyndong naduh ki Dorbar Shnong bad ruh ki seng tynrai ki dang duna bha shibun ha kane ka liang. Kumta ka long kaba donkam ban pynioh ia ka kynja jingialang ne Seminar kaba kyrpang na ka bynta ban ai jinghikai sha kitei ki nongialam ban nang ban thoh ia ki shithi naduh kiba iadei bad ki kot khubor, ki pulit bad ruh ki ophis sorkar. Ka jinglah jong ki nongialam jong ki tnad ne unit ban thoh ha ka rukom kaba beit bad kaba ryntih kan iarap ia ki hi ba kin kham trei khambha bad kin lait ruh na ki jingshah kyntait haba ki donkam ia kino kino ki jingiarap kiba kyrkieh ha kiwei pat ki liang.
Ki don ki briew kiba la kham rangbah kiba ieid bad sngewtynnad ban iakit iabah bad iatynrong lang ia ki kam bhalang khamtam lei ha kaba pynnneh pynsah ia la ka jong ka tynrai bad ka riti ka dustur, hynrei ka jingduna jong ki ha ka bynta ban thoh ia ki shithi ka buh jingeh ia ki ban iakynduh ia kito kiba ki donkam. Khamtam lei ha kaba iadei bad ki kotkhubor ka dei ka bynta kaba donkam eh ia ki nongkitkam ban shim khia namar ka dei ka kam kaba iadei bad ki paidbah hi. Bun sien ym ju lah ban pynmih ia ki jingthoh ba la phah da ki tnad seng bapher bapher namar ba kim shym la long satia kiba biang bad la shu phah da ki briew ban wan rah pateng khlem kano kano ka jingpynthikna ia ka jingshisha.
Bun sien ki kot khubor kim lah ban pynmih ia ki jingthoh namar ba ym biang ki jingsoi, ki jingkam jingkitkhlieh wat la ki long makna ki sobjek kiba donkam bha na ka bynta ka imlang ka sahlang ruh. Namar kata ka long kaba donkam ia ki seng bapher bapher ban peit ba baroh ki nongkitkam jong ki tnad kin long kiba la ioh jinghikai. Ka long ruh kaba donkam ban don ia ka jingai jinghikai halor kiba bun kiwei pat ki phang ha kaba iadei bad ki kam paidbah bad ka hok jong ki paidbah sha baroh ki nongkitkam khnang ba kin tip khambha ban trei ia ka kam kaba iadei bad ki paidbah. Khamtam lei ha kaba iadei bad ka ain ki nongkitkam ki dei ban tip khambha ia ka hok jong ki nongshong shnong bad ruh ia ka hok ba ka sorkar ka bat na ka bynta ka jingmyntoi jong ki paidbah hi.