Khliehriat, K’Lyngkot 27: Ha ryngkat lang bad ka ri India hi baroh kawei, ha Khliehriat, East Jaiñtia Hills District ruh la rakhe ïa ka sngi Repulic Day kaba 75th, ïa ka prokram la pynlong ha madan jong ka Higher Secondary School Khliehriat bad u myntri uba dei peit ïa ka kam sport, u bah Shakliar Warjri, u la wan ban pynher ïa ka lama lai rong jong ka ri India bad u la shim ruh ïa ka Rashtriya Salute jong ki 12 tylli ki kynhun parade ba kynthup ruh ka kynhun na ka tnat pulit jong ka district, ka NCC bad ka Scouts &Guides.
Hadien ka parade ka ioh ruh ïa ka jingpyni nam da ki taleau na ki tnat bapher bapher jong ka sorkar, la ioh ruh ïa ki jingshad bad jingrwai tynrai na ki khynnah skul.
Ha katei ka sngi la ai ruh ïa ki khusnam ba kyrpang ba kynthup ka Rymbai PHC halor ka jinglah ban pynit pynbiang ïa ki kam ki jam kiba hapoh ka MHIS& Ayushman Bharat-PMJAY, kumjuh ruh ka Anti-Narcotics Task Force (ANTF), jong ka tnat pulit, East Jaiñtia Hills District ba la pynkup urom da ka Rotary Club, Jowai, ïa ki nongtrei jong ka One Stop Centre, Khliehriat halor ka jinglah ki nongtrei ban iarap lem ïa kiba shem jynjar lane ‘Assisting women in Accessing Justice (AWAJ)’, kumjuh ruh kiba ai jinghikai ia ki paidbah nongshong shnong halor kumn ban ïada na kano kano ka jingshah thom bor ki kynthei, ki khynnah , kumjuh ruh ki ju pynshlur ïa ki paidbah ban leh kano kano ka kam kaba bha ban wanrah ïa ka jingkylla ha ka imlang ka sahlang.
La sam ruh ïa ki prize sha kiba jop ha ka March Past ha kaba ka skul Little Star Secondary School, Lad Rymbai ka la ioh ïa ka nam lah duh, ka skul Jawahar Navodaya Vidyalaya (JNV), Rymbai, ka la wan ba ar bad Khliehriat Higher Secondary School, Khliehriatres ka la wan ba lai, ha ka jingpyni ïa ka tableau, ka ophis District Rural develop ment Agency (DRDA), East Jaiñtia Hills District ka la ioh ïa ka nam lah duh bad ka tnat ka rep ka riang (Agriculture Department) ka la wan ba ar.
