Hapdeng ka jingiphuh iphieng pynkut noh ka seng Samla Umïam ïa ka taïew lehkmen
Ha kane ka sngi la pynkup burom ïaki riew tymmen jong ka shnong kiba la palat 60 snem ka rta
Nongpoh, K’Lyngkot 27: Hapdeng ka jingiphuh iphieng ki khun samla jong ka shnong Umiam, mynta ka sngi kila pynkut noh ïaka taiew lehkmen ki samla bala tip kum ka Youth Week,kaba la sdang naduh ka 22 tarik mynta u bnai.
Ïa katei ka taïew lehkmen ki samla la wna ban pynhap pyrda mynta ka sngi da u Bah Pynïaid Singh Syiem CEM ka KHADC kum u kongsan haka jingdonlang u Bah Rangkynsai Kharbuki MDC ka Umroi, u Bah Steven Kharkrang Rangbah Shnong ka Umiam bad kiwei kiwei ki riew rangbah.
Haba kren ha katei ka sngi naka liang u Bah Pynïaid Sing Syiem u la ai ka jingïaroh ïaka shnong Umiam kaba la lah ban pynlong kum katei ka jait prokram ban lum ban lang ïaki khun samla jong ka shnong ban don kawei ka jingmut, ka jingïajan bad ka jingïatylli ha kaba kum ka Council mynta ka dang pynmih sa kawei ka aiñ ban dang aibor ïaki Seng Samla, Seng Longkmie hapoh ka jingpeit jong ka Dorbar Shnong ban ap sa tang ka jingmynjur na u lat ka jylla bad kine 3 tylli ki mawbyrsiew kin long ki tnad treikam bad ka bor ban treikam haki shnong ki thaw.
U la ong ruh ba kum ki Samla ki don ka bynta ka khraw ban wanrah ïaka imlang ka sahlang kaba lait naki kam sniew kam thala da kaba ai nuksa ruh halor ka jingma u drok u la suhthied ha bun ki jaka bad lada ki khun samla ki ngop noh ha u drok, ka jaitbynriew kan sa tlot bad ïap suki suki bad dei haki samla ba ka jingshaniah ka don bad ka lawei jong ka jaitbynriew ha kaba u khot bad wer ïaki longkmie ki longkpa, ki khun samla ban snohkti lang naka bynta ban rat diengkhong ïa u drok.
Ha katei ka sngi la ioh ruh ban pynkup burom ïaki riew tymmen jong ka shnong kiba la palat 60 snem ka rta bad kumjuh ruh ki jingrwai sngewtynnad bala wan ban shim bynta da ki nongrwai ba paw naduh ka samla Kyntiewlin Mawphñiang, Snow White, Banker Kharkongor bad kiwei kiwei.