Jowai, K’Lyngkot 27: Shi bynta naka ’14th National Voters Day’ ha ka 25tarik mynta u bnai, naka liang ka ophis u Deputy Commissioner Election Branch, West Jaiñtia Hills District mynta ka sngi 25 tarik kala rakha ïa kane ka sngi, da kaba sam ïa ki Voters ID Card sha baroh ki nongthep vote ba thymmai ka District haka jingïalang kaba la long ha phyllaw ka Election Branch, Jowai halor ka phang “Nothing like voting, I vote for Sure”.
Baroh kitei ki nonthep vote thymmai ki don haduh 49 ngut na ki saw tylli ki Constituencies kata naka 1- Nartiang, 2- Jowai, 3- Raliang and 4- Mowkaiaw, haka juh ka por la leh burom kumjuh ïa ki ha kylleng ki Polling Stations kiba don hapoh ka District.
Ha kane ka sngi la donlang naduh u Deputy Commissioner bah B. S Sohliya, IAS, Additional Deputy Commissioner kong B. Blah, MCS, ADC bah F.B Basan, ADC kong HML Kynta, ADC kong D.V. Lyngdoh, Assistant Commissioner bah S. Phanbuh bad u Assistant Commissioner bah W.K. Kharbuli.
Na ka liang u Deputy Commissioner bah B.S Sohliya, ha ka jingsdang ïa ka prokram ula ïalam haka ban pule ïa ka pledge. Ha ka juh ka por kum u District Election Officer ula buh ka jingkyntu ïa baroh ki nongthep vote naduh ki samla bad kiba la tymmen ba kin shimkhia ban pyndep ïa ka hok ban leit thep ïa ka vote ba kordor jong ki ha kane ka Election ban wan jong ka Lok Sabha.
Shuh shuh u DC ula khot ïa baroh ki nongshong shnong ban ïatreilang bad ki nongïalam shnong ha kane ka Lok Sabha Election ka ban wan, khnang ba kan long kaba ïaid beit ïaid ryntih ha ka jingkhuid jingsuba.
Ula buh ruh ka jingkyntu kum ki nongshong shnong dei ban kiar na ka jingpynsaphriang ïa ki khubor lamler, da kaba wad bniah shwa ïa ki jingtip kiba lah ban ïoh na ki bor pynïaid District, khnang ban lait na kino kino ki khubor kiba ïalam bakla ha ki por Election.
Ha ka juh ka por ula ai khublei ïa ka kynhun Chi Iung kaba la shna ïa video kaba ïadei bad ka jinghikai halor ka rukom thep vote.
Ka kong B. Blah kala pynsngew ba ïa kane ka sngi NVD la rakhe ha baroh ki 230 tylli ki Polling Stations jong ki saw tylli ki Constituency bad la sam ruh ïa ki Voter ID cards sha kito ki nongthep vote ba thymmai kiba la pynrung kyrteng hapoh jong kane ka por (Special Summary Revision).
Ka la pyntip ruh ha baroh ki Polling Stations, na ka liang Supervisors bad ki BLO supervisors kin pynlong ïa ki prokram ai jinghikai lyngba ka Mobile Demonstration Van ha baroh kawei ka District bad kumjuh ha ki jaka ïew.
Kumba long mynta kala pyntip ki nongthep vote na baroh saw tylli ki Constituencies jong ka District ki don haduh 1, 66,728 ngut.
Hashwa kane ka ophis jong u Deputy Commissioner Election Branch kila dep ban pynlong ïa ka jingïakop dro dur ha conference room DC office, Jowai. kumjuh ka jingñiah Cycle (rally) ha ryngkat ka jingtreilang bad ka ophis District Sports Officer ïa kaba la laweh ïa ka lama da u SP ma C. Syrti, MPS kaba la sdang na Kiang Nangbah Stadium, Ladthadlaboh.
Ha kane ka sngi la sam ruh ïa ki khusnam ryngkat ki Certificate sha ki nongjop, na ka liang ka ophis u Deputy Commissioner Election Branch kala pynkup burom kumjuh ïaka nam District ICON sha ka Chi Iung bad ka PwD Icon sha u A. Lyngdoh, kumjuh sha ki BLOs.
Ïa ka jingïalang ha kane ka sngi la pynïadi da u bah W. K Kharbuli, Assistant Commissioner, Jowai katba ïa ki kyntien ai khublei la ïoh na u bah F.B. Basan, Additional Deputy Commissioner, Jowai.
