Jowai, K’Lyngkot 27: Ha Jowai hynnin ka sngi la rakhe ïa ka Republic Day ba 75 ha madan Jrisaleiñ West Jaiñtia Hills District ha kaba u myntri ba dei peit ïa ka Animal Husbandry and Veterinary Department u bah A.L Hek u la wan ban pynher ïa ka lama jong ka ri bad shim ruh ïa ka salute.
Haba kren sha ki paidbah ha kane ula pynkynmaw ïa ki nongshong shnong jong ka District shaphang ki nongïaleh laitluid napoh ka District, ha ka jylla bad ha ka ri India hi baroh. U la pynkynman ruh ïa ki jingjop jong ka jingtreikam ka sorkar jylla lyngba ki skhim bapher bapher.
Ha nongbah Jowai kila don 20 tylli ki kynhun kiba la ïashim bynta ha ka march-past kiba kynthup ïa ka District Police Jowai, NCC na JNV Mukhla, na Government Girls Higher Secondary Schools, Jowai, West Jaiñtia Bharat Scouts & Guides, Jowai bad 15 tylli ki skul.
La wan rah ruh ïa ki Tableau na ki 15 tylli ki tnat treikam sorkar jong ka District kiba la pyni ïa la ki jong ki jong ki jingjop ha ka jingtreikam jong ki.
Ha kane ka sngi u Myntri ula sam ruh ïa ki syrnod sha ki kynhun jop kiba kynthup ïa ka JNV Mukhla kaba la wan ba nyngkong, ka St. Mary Mazzerrello Higher Seondary School, Jowai ba wan ba-ar bad ka Government Boys Higher Seondary School, Jowai kaba wan balai.
Ha ka jingpyni Tableau ka District Horticulture Officer, Jowai ka la wan ba nyngkong, ka District Commerce & Industries Centre, Jowai kala wan ba-ar bad ka Water Conservation Officer Territorial Division Jowai kala wan ba lai.
Ka PHC kaba la ïoh ïa ka kyrdan ba nyngkong ka dei ka Sahsniang PHC ha ka jingpyntrei ïa ka Megha Health Insurance scheme (MHIS) & Ayushman Bharat Pradhan Mantri Jan Arogya Yojana) (AB PM- JAY).
U Myntri ula ai khusnam ruh ïa u HAV Amplias Synnah bad ïa u ABC/264 u Arki Nikhla ka tnat ANTF namar ka jingshakri hok jong ki ïala ka kamram.
Ki la don ruh ki prokram pynbyrngia ïa ki paidbah ba la shim bynta da ki dong bad shnong bapher hapoh ka nongbah Jowai. Ka la don ruh ka jingleit sam ïa ki bam bad jingai sngewbha sha ki jaka ri Khunswet da ki tnat sorkar bad da ki kynhun treimon sngewbha.