Shillong, K’Lyngkot 10: Ka tnat Pule Puthi ka Sorkar Jylla ka dang ap na ka tnat Ministry of Education ka Sorkar Pdeng ban pyllait ïa ka pisa na ka bynta ka bai bam ne Scholarship jong ki 67,000 ngut ki samla pule.
Ka Meghalaya ka donkam kumba T.63 klur ban siew bai bam lane Scholarship sha ki samla pule ka Jylla bad haduh mynta ka Sorkar Jylla ka la dep ban pyllait T.34 klur.
U Myntri ka tnat Pule Puthi ka Sorkar Jylla u Rakkam Sangma ula ïathuh ba ka tnat ka la dep ban phah lut ïa ki jingdonkam kum ki Utilization Certificate (UC) shaka Ministry of Education ka Sorkar Pdeng.
“Ka tnat Ministry of Education ka Sorkar Pdeng ka la pan ïa ki UCs, ha kaba ka tnat ka la dep ban phah. Ka jingslem ka dei hi namar ka Ministry ka kwah ïa ki kot ki sla kum ki UCs bad ka la bthah ban pyndonkam shwa ïa ka pisa katba don ha kaba ka Sorkar Jylla ka la dep ban pyndonkam ka pisa jong ka First Installment” la ong u Rakkam.
