Shillong, Kyllalyngkot 10: U Myntri ka pule puthi ka jylla u Rakkam Sangma mynta ka sngi Balang ula pyntip ba ka Jylla kan sdang pyndonkam noh ïa ki kot NCERT naduh mynta u snem hynrei kan long shuwa tang ha ka subjek English, Maths bad Science bad ha u snem ban wan, yn sa pyndonkam lut ha baroh ki subjek.
Haba ïakren bad ki nongthoh khubor, u Rakkam Sangma ula ong, ba ka jingsdang pyndonkam ïa ki kot NCERT ka dei ban long naduh ka 16 tarik u Kyllalyngkot hynrei namar ka jingwan ka President jong ka ri kumta yn pynkynriah noh sha ka 25 tarik mynta u bnai bad kane ruh kan shong kat kum ka jinglait jong u Myntri Rangbah ka jylla.
U Rakkam Sangma ula ong, ba ïa ki kot lah ban ïoh naduh mynta u bnai namar ba yn sdang pyndonkam noh ïa kitei ki kot skul naduh une u snem pule uba mynta.
“Ki kot NCERT ki ban pyndonkam ki kynthup ïa ka subjek English, Maths bad Science ïa mynta u snem, namar kam da donkam than ban pynkylla eiei” ong u Rakkam.
Ula ong ba ïa kitei ki kot skul yn pyndonkam naduh ka klas I haduh klas XII hynrei na ka bynta ki skul kiba hikai ha ka ktien Khasi bad Garo ki lah ban pyndonkam shwa da ki kot kiba ki hikai mynta hynrei naduh u snem ban wan yn pyntreikam pura noh da ki kot skul NCERT.
Ula ong, na ka bynta ka Social Science ka don ka bynta kaba hap ban pyndam bad kumta la thaw ïaka Committee khnang ba kin lah ban pynbeit bad pynkylla bad ban pynrung noh ïa ki bynta jong ka jylla bad ïa kane ka kam yn leh mynta baroh shi snem.
Ula ong ba ki don bun tylli ki skul ha ka jylla kiba pynïasoh bad ka MBoSE hynrei kim shym la pyndonkam pat ïa ki kot skul kiba la bthah da ka MBoSE, kumta ka tnad pule puthi kan kan sa bthah ïa baroh ki skul ba ka long kaba kongsan ban pyndonkam beit da ki kot skul jong ka MBoSE.
“Mynta u snem, ngin ym lah ban pyntreikam pura ïa kane hynrei la thikna ba ha u snem ban wan, ka jingpyndonkam da ki kot NCERT ha ka MBoSE kan long kaba kongsan ïa baroh ” ong u Myntri ka tnad pule puthi.
Ha kaba ïadei bad ka jingpyrshah ki nongdie kot ban pyntreikam mardor ïa ki kot NCERT, u Rakkam ula ong, “Namar katto katne ki daw, mynta u snem ngin ym lah ban pyntreikam pura hynrei naduh u snem ban wan, ngin pynthikna ba baroh ki skul ki dei ban pyndonkam beit da ki kot skul kiba la bthah da ka MBoSE”.
“Ha ka pule puthi, artylli kiei kiei kim dei ban jia, ka politic bad ka kam khaïï. Kaei kaba dei ban pule bad kaei ka Curriculum kaba dei ban pynwandur ne ka Syllabus ne kaei kaba ki khynnah ki dei ban pule ka dei ban dei kaba la pynkhreh bad rai da ki nonghikai, ki riewstad, Professor, ki jaka pule bad ym da ki nongkhaïï bad ha ka jingpynïaid ïa kino kino ki jaka pule kam dei ban don ka politik, namar lada kwah ban pynduh pyndam ïa kano kano ka jaka pule pyndonkam da ka buit politik bad kan sa don ka jingïapait hapdeng ki nonghikai bad ki khynnah pule bad ban ïatan iwei iawei pat bad ha kaba kut ka jaka pule kan sa hiar arsut” ong u Rakkam.
