Shillong, K’Lyngkot, 10: U Myntri ka tnat Pule Puthi jong ka Sorkar Jylla u Rakkam A. Sangma u la maham tyngeh ba ka Sorkar kan leh da kaba tyngeh pyrshah ïa kito kiba donkti ban ai nong pateng ïa ka kam hikai ha ki skul Government Lower Primary School kiba don ha ka jylla.
Ha ka jingïakren bad ki lad pathai khubor ha ka sngi Balang, u Sangma u la ïathuh ba u la iohsngew ha kiba bun ki Government Lower Primary Schools, ka jingaiwai pateng ïa ka kam ka shyrkhei bha, ha kaba ki nonghikai ba la thung da ka sorkar ki thungkam bujli da u/ka ban trei bujli ha ka jaka jong ki.
“Ngin ym ailad kum kine kin jia. Ngin pynthikna ba ki ophisar jong ngi kin sa leit tohkit bad pynlong ka jingjurip ïa ki skul bad ngin pynthikna ba manla ki nonghikai kin treihok la ka kamram bad lada phim trei hok ïa la kamram, phi pynjot ïa ka lawei jong ki khynnah skul,” u la ong.
“Namarkata, nga kyrpad ïa ki nonghikai ha kylleng ka jylla ba ngin shim ïa ka jingkitkhlieh da kaba ai ïa ka pule ka puthi kaba bha tam sha ki khynnah,” u la bynrap.
Haba kylli, u Myntri u la ong, “ha kaba ïadei bad ki nonghikai ba la shu thung pateng, lada ka tnat ka ioh pdiang ïa ki jingujor ryngkat ki sakhi sabut kiba biang, nga ngeit ba ka sorkar kan hap ban shim ïa ki sienjam kiba tyngeh.”
U la kyntu ruh ïa ki nonghikai, kiba leh ïa kine ki jait kam ba kan jin da la bha ba kin iehnoh ïa ka kam ne shim noh da ka VRS..
Katkum ka jingong jong u, ka jingthungkam ïa kiwei pat ki bym dei ki nonghikai ka jia ha manla ki district ka jylla..
U la ïathuh ruh ba shen un sa pynlong ïa ka jingïalang ban ïakren halor kane ka mat bad kyrpad ruh ïa ki Deputy Commissioner bad ïa ki District Officers jong ka tnat ba kin pynthikna ba ki nonghikai ki dei ban shim ïa ka jingkitkhlieh halor ka kamram ba la bynshet ha ka tyrpeng jong ki.
