Shillong, K’lyngkot, 10: Ka District Magistrate jong ka East Khasi Hills ka la pynjari da ka hukum hapoh ka Section 144 CrPC ban mana tyngeh ban pyndonkam da ki bom dynamite bad ki dawai bih hapoh ki um ki wah, ki wahduid namarba ka pynïap lut ïa ki dohum dohwah hapoh ka East Khasi Hills.
Ïa kane ka hukum la pynmih ha ka 8 tarik, mynta u bnai bad la pyllait sha ki lad pathai khubor ha ka sngi Balang.
Ka jingpynmih ïa kane ka hukum ka long hadien ba la ïoh pdiang ba ka don ka jingpynïap dusmon ïa ki dohkha nduh Shka Wah Umsoh shaduh Shka Wah Umsong, ha Wah Japuh bad Wah Jaduh da kaba pynbthei bom bad pyndonkam da ki dawai Chemical ba long bih.
“Ka jingpyndonkam ïa ki dawai bih kan buh jingman ïa ki dohkha, ïa ki soh bad ki syntiew nalor ba ka buh jingma ruh ïa ki briew,” la ong ka hukum.
Kum kine ki kam kin wanrah ruh ïa ka jingduhnong kaba khraw ïa ki nongshong shnong hadien habud, la ong ka District Magistrate.
Kane ka hukum kan treikam mardor tad haduh ban da pynbna da kumwei pat.
