Kan sa poi ka por ba ngan shongthait, ki samla ki dei ban pynkhreh ban shim ïaki lyngkor nongïalam: B. Thangkhiew

Nongpoh, K’Lyngkot 07: Ban nang pynkhlaiñ ïaka jingshakri jong ka seng, ka Ri-Bhoi Youth Federation haka sngi Saitjaiñ kala ioh ban pynskhem biang ïaki nongïalam ba pura jong ka RBYF 3 Shnong Unit kawei naki Unit kaba don ka jingïatylli bad treikam bha naduh bala suid la shor ïaka ha u snem 2021.
Ki nongïalam ba thymmai jong ka RBYF 3 Shnong Unit jong ka samoi treikam 2024-27 ki kynthup ïa u Badonbok Lyngdoh President Cleverson Marweiñ Vice President, Vickham Marweiñ General Secretary bad kiwei.
Ïa kitei ki nongïalam ba thymmai la wan ban pynskhem da u Bah Bipul Thangkhiew President ka RBYF Sengkmie haka jingdonlang u Bah RJ Thangkhiew Political Secretary, Denis Syngkli Ornaising Secretary, Bawan Marweiñ Sports Secretary ka sengkmie bad kiwei kiwei ki nongïalam naki Circle bad Unit bapher bapher haka jingïalang kaba la long ha Umlyngkdait.
Haba kren ha katei ka sngi naka liang u Bah Bipul Thangkhiew kum u President ba rangbah ka seng u la ong ba ka seng RBYF haduh mynta ka don kumba 373 tylli ki Unit kiba im bad kiba khih ba ksar ban ai ka jingshakri sha ki paidbah watla shibun kila don ruh kiba ïap noh shiteng por bad tlot haka rukom treikam da kaba ai jingïaroh ïaka 3 shnong Unit ka dei kawei naki Unit kaba don ka jingïatylli kum shipara bad kaba leh shibun ki kam ban rah ïaka burom jong ka seng bad khamtam ïaka imlang ka sahlang.
“Kan sa poi ka por ba ngan shongthaid noh naka kam nongïalam bad katba nga dang ïalam ïaka kynhun ka thong ka dei ban pynim, ban pynshngaiñ bad ban ïalam haka rukom kaba dei ba ha kawei ka sngi kine ki samla naki Unit kin kit ruh ïaka lyngkor kaba khia ban long kum ki nongïalam ka sengkmie” la ong u Bah Bipul da kaba ai nuksa ruh ba ma u kum u nongïalam ba mynta u dei tang u nongïalam ka RBYF Kyrdem Kulai Unit haki por ba mynshuwa hynrei dei ka jingtrei shitom bad ka thong ba u poi sha ka kyrdan nongïalam ba ha khlieh duh jong ka seng.
U Bah Bipul u la ong ruh ba haka por ba u bat kum u nongïalam ka Kyrdem Kulai Unit ki don shibun ki jingduna hynrei um shym la kdew kti ïa kita ki jingduna jong ka seng hynrei ka jingïatreilang ka long kaba kongsan bad udei ruh uwei naki nongïalam bala neh slem tam haka sengkmie naduh u snem 1999 ba u la shim ïaka kyrdan kum u dkhot ka sengkmie.
U la ong ruh haka jingtreikam bad ka jingïaid lynti kum u nongïalam haka Unit, ki nongïalam ka sengkmie ki ju phah thoh ïaki shithi ban phah sha ki ophisar lane ki tnad sorkar lada donkam bad um ju sngew phylla ïakata ba ki nongïalam ka Central Body ki phah ïakata ka kam ha u hynrei ka jingïatreilang kan rah ïaka burom jong ka seng tad haduh ba un da shimti syndon kum u nongïalam.
Dei halor katei ka nongrim ba u Bah Bipul kum u nongïalam ka RBYF u kwah ba kitei ki dkhot bad ki nongïalam ka Unit kim dei ban don kano kano ka jingsngewpher ba ki dei ki dkhot ba ri \t haka seng hynrei ka jingsngewrit bad ki kam kan pynkhraw ïaki ha kawei ka sngi kumba ka 3 shnong Unit kadei kawei naki Unit kaba ïa tylli bha bad long kum shipara ban kyntiew iwei ïa iwei ym tang ka burom jong ka seng hynrei ka imlang ka sahlang baroh kawei bad kyrmen skhem ba katei ka kam kaba ki trei kan dang iai rhem ha ki sngi ban dang wan, u la bynrap.