Mawkyrwat, Kyllalyngkot 07: Ka Centre for Youth Development (CYD) jong ka Mawkyrwat Presbytery ryngkat ka jingkyrshan ka District Sports Promotion Society, South West Khasi Hills District ka la ïoh ban pynlong ïa ka 3rd Mawkyrwat Great Marathon ha Maharam Government Higher Secondary School, Mawkyrwat ha kaba u kongsan ha kane ka sngi u dei u bah Ehbok Syiemlieh, PTI jong ka ophis u District Sports Officer (DSO), South West Khasi Hills District.
Ha kane ka jingïakop mareh ki nongïashimbynta baroh ki don haduh 58 ngut kiba na kylleng ki jaka jong ka South West Khasi Hills District bad nabar jong ka ruh kata 19 ngut ki dei na ki rangbah ne Senior Men, 12 ngut ki kynthei ba kham heh ne Senior Women, 18 ngut kiba hapoh 18 snem jong ki shynrang bad 9 ngut kiba hapoh 18 snem jong ki khynnah kynthei.
Ki nongjop ha kane ka jingmareh ki long kiba hapoh 18 snem jong ki shynrang ba wan ba nyngkong u dei u Wanbok Lyngdoh Mawphlang, ba ar u Bines Kharlyngdoh, bad ba lai u dei u Neverson Jyrwa. Nangta, kba hapoh 18 snem jong ki khynnah kynthei pat ka Lyntijingkyrmen Kharjahrin ha ka kyrdan ba nyngkong, ka Larijanai Wartde ba ar bad ka Teilyntishisha Ramsiej ha ka kyrdan ba lai.
Shuh shuh ki nongjop kiba dei na ki rangbah ki long u Banjoplang Wanniang ba wan ba nyngkong, u Jomsingstar Ramsiej ba ar bad u Willborn Wanniang ba wan ba lai, bad ki nongjop na ka liang jong ki kynthei ba kham heh ki long ka Bandasharai Marweiñ ba nyngkong, ka Marqueenless Ramsiej ba ar bad ka Daplin Wahlang ba wan ba lai.
Ha kane ka sngi ka la don ruh ka jingaisngewbha ïa kawei na ki nongmareh kaba la kham rangbah kata sha ka kong Snora Lyngkhoi.
Ïa ka jingialang ban sam ïa ki khusnam la pynïaid da u bah Bording Lyngdoh, Chairman ka Center for Youth Development, Mawkyrwat, u bah Harvester Khongthaw, Secretary jong ka Center for Youth Development ula ai ka jingkren khublei bad u bah Overjoy Lyngdoh u la ai ka jingduwai kyrkhu pynwai.
