New Delhi, K’lyngkot, 07: U Myntri Rangbah Duh, u Narendra Modi u la ïashim bynta ha ka All India Conference jong ki Director General/ Inspector Generals of Police kaba 58 ha ka 6 bad 7 tarik u Kyllalyngkot, 2024 ha Rajasthan International Centre, Jaipur.
Ha ka jingkren shaphang ka jingpyntreikam ïa ka aiñ kaba thymmai kaba ïadei bad ki kam beaiñ, u Myntri Rangbah Duh u la ong ba kane ka dei ka jingkylla kaba khraw ha ki kam aiñ. U la ong ba aiñ ki ba thymmai kiba ïadei bad ki kam beaiñ ki dei kiba la saiñdur da ka jingmut ‘Ki briew hashuwa, ka burom hashuwa bad ka hok hashuwa’ bad ha ka jaka ban treikam da u ‘dieng’ ki pulit mynta ki dei ban trei da ka ‘data’. U Myntri Rangbah Duh u la kyntu ïa ki heh pulit ba kin pyrkhat thymmai bad ba kin pyni ïa ka mynsiem jong kine ki aiñ ba thymmai sha ka imlang sahlang. U Myntri Rangbah Duh u la ban jur halor ka jingai jingtip ïa ki longkmie bad ki khynnah kynthei shaphang ki hok jong ki bad ki jingïada ba ki ïoh hapoh ki aiñ ba thymmai. U la kyntu ïa ki pulit ba kin peit bniah ïa ka jingshngaiñ jong ki longkmie da kaba pynthikna ba ki longkmie ki ïoh ban treikam khlem kano kano ka jingsyier ‘ha kano kano ka por ne kano kano ka jaka’
U Myntri Rangbah Duh u la ong ba ka long kaba donkam bha ba ki briew kin don ka jingsngew kaba bha shaphang ki pulit. U la ong ba ki thanat ki dei ban pyndonkam ïa ka social media ban ai jingtip na ka bynta ka bha ka miat jong ki paidbah. U la ai jingmut ruh ïa ka jingpyndonkam ïa ka social media ban ai jingtip haba don ki jingjia lynshop ki bor ka mariang bad ka jingai jingïarap ha kum kine ki por. U la ong ruh ba dei ban pynlong ïa ki lympung ïalehkai ban pynkhlaiñ ïa ka jingïadei hapeng ki briew bad ki pulit. U la kyntu ruh ïa ki bor Sorkar ba kin leit sah ha ki jaka khappud ban wanrah ïa ka ‘jingïadei’ bad ki briew ha kine ki jaka.
U la kren shaphang ka jingseisoh jong ka solar mission kaba nyngkong jong ka India – Aditya-L1 bad ka jingpyllait im ba mardor ïa 21 ngut ki briew kiba don ha ka lieng ha duriaw Arabian da ka Indian Navy, ha kaba u la ong ba kine ki jingjop ki pyni ba ka India ka dei ka bor kaba dang kiew shaphrang ha ka pyrthei. U la ong ba ka jingjop jong ka Aditya-L1 ka ïasyriem bad ka jingjop jong ka Chandrayaan-3 mission. U la ong ruh ba u dap da ka jingsngew sarong shaphang ka jingjop jong ka Indian Navy. U la ong ba katkum ka jingkiew kyrdan ka India ha ka pyrthei bad ka jingkiew ka bor jong ka ri, ki bor pulit ka India ki dei ban don ka jingkylla sha ka kynhun pulit kaba katkum ka juk mynta khnang ban pynurlong ïa ka thong ban don ka India kaba la kiew shaphrang shuwa u snem 2024.
U Myntri Rangbah Duh u la sam ruh ïa ki khusnam Police Medal for Distinguished Services bad u la pynkut ïa ka DGsP/IGsP Conference kaba lai sngi ha Jaipur.
Ha kane ka conference, la wan ïashim bynta ruh da u Myntri Sorkar Pdeng ba dei khmih ïa ka tnat Kam Pohiing, u National Security Advisor, ki Myntri Khynnah kiba dei khmih ïa ka tnat Kam Pohiing, ki DGP/IGP jong ki Jylla/UT bad ki khlieh duh jong ki kynhun pulit ka Sorkar Peng / ki Central Armed Police Force bad kiwei kiwei. Kumba ju long ha ki snem ba la dep, la pynlong ïa kane ka conference ha ka rukom treikam hybrid ha kaba palat 500 ngut ki ophisar pulit ki la ïashim bynta na ki jaka bapher bapher jong ka ri. Kane ka conference ka la peit bniah ïa ki bynta ba kongsan jong ka jingshngaiñ ha ka ri, ba kynthup ruh ïa ki aiñ ba thymmai ba ïadei bad ki kam beaiñ, ki rukom treikam ban ïada na ki kam kieng atiar, ki kam pyntriem left wing, ki jingma ba dang mih ha ki kam cyber, ki kam ha kylleng ka pyrthei ban ïada na ki kam ïaumsnam, bad kiwei kiwei.
