New Delhi, Kyllalyngkot 7 : Ka Indian Journalist Union (IJU) ka ai ka jingkyrshan ba pura ïa ka Journalist Union of Assam (JUA) ban pynrem jur ïa ka jingktah kti jong u Nongthoh Khubor ha u District Commissioner (DC) ka Nagaon u Narendra Kumar Shah.Une u Nongthoh khubor u dei na ka NB News Channel u Deepakar Medhi bad kane ka la jia ha ka Sngi Thohdieng. Ka IJU bad JUA ki dawa ba ka sorkar Assam ka dei ban thung ka jingtohkit halor kaneka jingjia bad ban pynshitom kat kum ki kyndon aiñ ïa utei u DC.
Kat kum ka jingïathuh jongu President ka JUA bad General Secretary u Samim Sultana Ahmed bad u Dhanjir Kumar Das, u Medhi u la leit ïa kynduh ïa u DC hadien ba u la dep ïoh jingbit na u DC hi ban ïarap ïa kawei ka longkmie ban ïoh ïa ka baibam nongtymmen jong u kurim jongka namar naduh ba khlad u kurim jongka ka khlem ïoh ïa ka bai bam nongtymmen.
Hadien ba la dep ïakren u lam ih noh na kamra jong u DC ban leit phai noh hynrei ha kum katei ka por kawei ka pulit kynthei ka la kren tohmet ïa katei ka longkmie tang namar ba ka kylli ïa ka jaka leit shabar. Dei ha kum katei ka por haba u dang kylli jingkylli ïa u DC da kaba ring video ba u Shah u la kiew jingbitar bad knieh ïa ka camera bad ktah kti ïa u Medhi. Hadien kane la bat ïa u Medhi haduh ka por miet bad pyllait ïa u tad hadien ba la dep record ïa ka jingkren jongu bad kumjuh ruh ai ïa ka camera jongu hadien ba la dep delete ne pynduh noh ïa ki video. Katba u Shah u pyrshang ban kyntait halor kane ka jingjia.
U IJU President uba dei ruh u dkhot ba rim ka PCI u Geetartha Pathak lem bad ka Secretary General bad Vice President ka International Federation of Journalist ka Sabina Inderjit ki la pynpaw ba kane ka jingjia ym dei ba ka pynpaw ïa ka jingleh donbor ki briew ka aiñ bad kiba kum kine ki jingjia ki la jia na ka por sha ka por ïa ki nongthoh khubor ha Assam . Halor kane ki la dawa ïa u Myntri Rangbah u Himanta Biswa Sarma ba thung da ka jingtohkit halor kane bad ban pynshitom ruh ïa utei u ophisar uba leh ïa kane ka kam beaiñ.
Ka IJU ka ai ruh ka jingïaroh ïa ka JUA , ïa ka Nagaon Press Club, Cuwahati Press Club kiba la shim khia kyrkieh kyrkieh halor kane ka jingjia bad ka khot bad ïawer ruh ïa baroh ban ïeng tylli lang khnang ban ïaleh pyrshah ïa kine ki bor kiba thmu ban khang lad bad ïuhroit ïa ka jinglaitluid ki lad pathai khubor.
