Shillong, Nohprah 30: Hadien ba ka Seng UDP ka la pynpaw ba ka kwah ban wanrah da ka lynti rel ban kit mar ha East Jaiñtia Hills, ki Sengbhalang bapher bapher ki la pynpaw ka jingpyrshah kaba jur da kaba ong ba ia mynta hi ym pat donkam rel la ka long ka rel kit mar ne ka rel kit briew ruh.
U President ka KSU u Bah Lambok Marngar, haba kren ha ka lyngkhuh sngi ïap u Kiang Nangbah ha Shillong ha jaka ba tei ia u Mot u Kiang Nangbah hajan Civil Hospital Shillong, u la ong ba ka sorkar ne ki Party kiba don ha ka sorkar ha ka jaka ba kin iakren bad pylleit jingmut ia ki jingeh jong ki Samla, ki ia lapmiet pynban ban iakren ia kata ka lynti rel.
” Balei kim ïohi ïa ki jingeh ba ki Samla ki ïakynduh haduh katne katne, la long ha ka Seng kam Seng jam, ka ïoh kam ïoh jam bad kiwei kiwei, ki pynleit jingmut pynban kumno ban wanrah lynti rel. Balei ki Nongïalam jong ngi ngi kwah shong rel haduh katne katne”, la ong u Bah Lambok.
U la ong ba ka khubor kaba shai sha ka sorkar bad sha ki Party ba don ha ka sorkar ba lada ki wanrah jubor ïa ka lynti rel ka ding kan klang ha ki khun Samla.
U la ong ruh ba ka KSU bad kiwei de ki Sengbhalang haduh mynta kim pat mon ne mynjur ban wanrah rel sha ki lum Khasi Jaiñtia.
Na ka liang u Bah Kitbok Nongphlang, Vice President ka FKJGP ruh haba kren ha kane kajuh ka jingïalang ban kynmaw burom ïa u Kiang Nangbah, u la ther tyngeh ïa ka Seng UDP kaba la pynpaw ïa ka jingangnud ban wanrah noh da ka rel kit mar. U la ong ba kita ki Seng Riewlum kiba ju kam ba kidei ki Seng ieit ri, hynrei mynta ki ka kylla long ki Seng die ri bad ki Seng lenlum.
U la ong ba ka FKJGP ruh ka pyrshah jur ïa ka jingkwah rel palat ka UDP bad kiwei pat ki Party.
Kumjuh ruh ka Seng Jaiñtia National Council(JNC) ka la ong ba kam kwah ba ka rel kan wan sha East Jaiñtia Hills. Haba kren ha ka jingïalang kynmaw ïa u Kiang Nangbah ha Khliehriat, u President ka Seng u Bah Sambormi u la ong ba kane ka jingkwah rel kam dei na ki paidbah, hynrei kadei na ki Nongmihkhmat khamtam u Nongmihkhmat na Khliehriat uba ju pynpaw borabor tang shaphang ka lynti rel, katba ki kam pynroi pat um ju lah ban wanrah.
U Bah Sambormi u la ong ba ka East Jaiñtia kam donkam ïa ka rel, hynrei ka donkam ki surok kiba biang, ki jaka pule kiba biang, ki jaka sumar bad ki tnad treikam bapher bapher ba kin wan ha East Jaiñtia Hills District.
