Shillong, Nohprah 30 : U President ka Meghalaya Pradesh Congress Committee, Bah Vincent H Pala u la ong ba kim lah ban len ïa ka jingshisha ba ka Voice of the People Party (VPP) kan dei ka party kaba kiwei pat ki party ba don ha Meghalaya kin shem jingeh ban ïakhun pyrshah la ka long ha kane ka elekshon MP kaban sa long shen ha u snem ban wan kumjuh ruh ha ka elekshon MDC.
Haba kren bad ki lad pathai khubor, u Bah Vincent ba dei ruh u MP na Shillong Parliamentary Seat u la ong, “Ka VPP khlem pep kan dei kawei na ki party kaban lah ban kring ïa ki vote ha kane ka elekshon kaban wan namar dang tang ha ki khyndiat por ba la seng ruh ka la ïoh ka jingïoh vote kaba biang bha. Hynrei la katta pat ïa u soh ngin sa tip tad haduh ban da kut ka elekshon haduh katno ka VPP ka khlaiñ.”
Da kaba kob pat ba ki paidbah ka jylla ki dang shaniah ha ka Congress, une u nongïalam ka Congress u la ong ruh ba ha ka elekshon MP ki dang sngew skhem ba ka party kan dang ïoh ïa ka jingkyrshan namar kat shaba leit ka lyer jong ka Congress ka dang sawa.
“Dei tang ka party Congress kaba don ka kyrdan kaba biang bha ha Delhi namar man ha ki jingïalang kiba long kylleng kylleng ki paidbah ki pynpaw beit ba ki dang kham noh sha ka Congress,” u la pynpaw biang.
Lah ban kdew hangne ba haduh mynta hi ki party kiba la pynbna ïa ki kyrtong kiban aireng ha kane ka elekshon MP na Shillong seat nalor ka Congress ki kynthup ïa u Dr. Ricky AJ Syngkon na ka VPP, Dr. Ampareen Lyngdoh na ka NPP bad u Bah Robertjune Kharjahrin na ka UDP.
